Ua atoa le ono masina e lei toe maua lava se fesootaiga a le tina ia Alaimoana Leapai ma lona atalii o Falevi Umutaua Leapai o Malie ma Matautu i Lefaga. Na ta‘u leiloa mai lava lea alii i le masina o Novema o le tausaga na tea nei.
Na logo mai e le kamupani vaa o loo galue ai i Europa o loo tau saili ma o le fesootaiga a lea kamupani i Samoa nei le auaunaga o vaa (Samoa Shipping Services) na logo ai le aiga o lenei alii.
O le faamatalaga se‘i fai suesuega poo fea tonu ua iai lea alii ona toe logo mai lea. E oo mai i le asō, e lē o misi lava le agai o le tina e saili ae e leai lava se tala ua suia se‘i vaganā ai o lea lava e lei mae‘a suesuega.
O le faamatalaga a le tina ia Alamoana e maualuga lava lona manatu ua maliu si ana tama ma ana soifua foi semanū ua maua lava se fesootaiga ma ia.
“Tuu ia lona tamā e moni lava ae e lē tutusa le vavalalata ma lona tamā ma a‘u nei. Ou te iloa ana ola pea ua leva ona fesootai mai ae talu mai Novema e matuā leai lava se telefoni ae o se text foi poo le ā lava se isi auala o fesootaiga, e oo lava foi i nisi o alo o le atunuu na galulue faatasi i Europa ma la‘u tama e matuā leai lava se faamatalaga poo iloa e se isi se mea o iai lo‘u atalii,” o le faaaliga lea a le tina ia Alamoana.
E lei mapu lava foi le asiasi atu o le tina i le ofisa lea e i Apia a le Samoa Shipping Services poo le auaunaga o Vaa e tau saili sina faamatalaga, ae na pau le faamatalaga a le auaunaga o loo faatali foi i latou i le kamupani vaa a le Atu Metiterane lea na galue ai lona atalii se‘i mae‘a a latou suesuega ma aumai se tala mautu e faatatau i le leiloa ai o lenei alii.
“Na amata o ma o i ai i vaiaso uma, ae ua lagona foi le matamuli ne‘i faapea o tau saili atu se taui o le ola o le ma tama,” o le saunoaga lea a le tina.
O lea la ua ta‘i masina ma asiasi pea ae e leai lava se tali ua aumai se‘i vaganā ai le tala lava lea ua leiloa.
O le alii ia Falevi Umutaua Leapai ua 26 tausaga le matua. E lei faia sona aiga ae o le faatolu lea ona maua o ona avanoa e galue ai o se seila i luga o vaa la‘upasese tetele nei poo meli o loo feoai i Europa ma isi vaega o le lalolagi.
O meli la‘upasese nei a le kamupani lea o le Atu Metiterane o loo malosi fesootaiga ma Samoa i lenei vaitau e ala i le maua ai o avanoa faigaluega o alii ma tamaitai auvaa o Samoa nei i soo se itu o le lalolagi. Ona pau lea o se mataupu ua agiga mai faapea ua ta‘u leiloa ai se isi mai i Samoa ua galue ai i luga o nei vaa tetele.
Sa iai se isi faalavelave na faapea na pule ai se tasi o seila i tausaga ua tuanai i lona soifua, ae o le mataupu lenei ua matuā leai lava se faamatalaga i le mea ua tupu.
E iai foi aiaiga faapea, a atoa lelei lava le tausaga o ta‘u leiloa se tasi ona faatoa mafai lea ona iai nisi laasaga o nei suesuega, ma na ta‘ua e le tina e umi tele ona faatali lea tausaga ae o le manatu ua tatau ona fai se sauniga faamavae e aloaia ai ua maliu lana tama ae e lē mafai ona faia i lenei taimi ona o tuutuuga nei. O le mau foi lea a le auaunaga o Vaa lea e faapea mai, e lē mafai lava ona soona fai se tala ne‘i mea ane ua ta‘u ta‘u ua maliu lenei taulealea ae uma ane suesuega ae toe maua mai o soifua ma o le mafuaaga lea o le faatali foi o le latou ofisa i Apia se‘i faamautu mai lava se lipoti mai le kamupani vaa a le Atu Metiterane.
O le tiga o iai nei o le tina o lenei alii ona e foliga mai e lē o iai lava se galuega o faia e faamae‘a ai ia suesuega ae ua na o le faanofo mai lava o ia i tala nei o loo leiloa pea e oo mai i le taimi nei.
