Na matuai faatumulia le Metro Arts Sports Centre i Crestmead i le po o le Aso Faraile ma le po o le Aso Toonai ona o le lolofi atu o le toatele se‘i maimoa ma molimauina le taaloga o le Volipolo e sauni ai mo le taamilosaga tele lea o le a faia i le tausaga fou.
O le ‘au a Saina ma Ausetalia sa taaalo mai i Kuiniselani ae faapea foi isi ‘au a le lalolagi o loo faagasolo foi a latou taaloga auā lea lava taamilosaga.
O le au volipolo a Ausetalia e igoa o le Volleyroos, e na o le toatasi le Samoa o loo filo ai, le susuga lea ia Alesana Neemia Mote.
O ona mātua o Fai‘avalesua Tasi Mote (Vaiee) ma lona tina ia Iemaima Mote (Auala & Moataa).
Na manaia le taumafai a lea foi alo o le atunuu i lana taalo, sa faafiafiaina ai le toatele o ona aiga ma uo sa auai, auā na manumalo le ‘au a Ausetalia o loo taalo ai. Ua toe taliu atu nei i Canberra e sauni ai le latou malaga i Jamaika e taaalo ai ma isi ‘au.
O le faagasologa o nei taaloga o loo filifili ai Pools mo le taamilosaga a le lalolagi i le taaloga lava lea o le Volipolo.
