Na aofaga potopoto le paia ma le mamalu o le atunuu i vaega o ao sinasina, mafutaga ma aiga i le Aso Tofi o le vaiaso talu ai, i le uluai semina mo fesootaiga lelei i soo se faatasiga a le atunuu ma le mamalu lautele.
Sa fetalai le sui faalauiloa le afioga ia Lupematasila Ian Saipele, o lenei faamoemoe ia faatāua ai auala e faasoa ai faamatalaga faamoemoeina ma faatuatuaina i totonu o aiga, mafutaga, ekalesia ma le atunuu lautele o loo galulue ai le mamalu o le atunuu.
O le aoauli o lea lava aso na amata ai i se sauniga Lotu puupuu e Rev Itione Eli lea semina ma faagasolo ai loa le polokalame. Sa vaaia foi le faagaeetia o le Peresetene o La‘u Samoa afioga Alaalatoa Emani Alaalatoa i le lagolago atu a sui auai ma iloa ai e manaomia lava lea fesoasoani auā le faigofieina o fesootaiga.
O le afioga foi ia Tauiliili Sa‘u Karasini le Peresetene o le Ao Sinasina na faailoa lona fiafia tele i lenei Semina muamua o lea ituaiga faatoa faatino.
O nisi o nai tamā ma tina matutua na auai e lē gata o le toe fafagu ai o auala masani na soifua mai ai i Samoa i faiga sa logopuialiiina ai sui o aiga, afioaga ma ekalesia sa masani ai, ae na faapupula foi e lenei semina auala fou i nei vaitau ua faaaogāina e atili faaleleia ma faafaigofieina ai le femalamalamaai.
E lē gata i lea silafia fou na faasoaina i le semina, a ua fuafua foi le komiti ia faasafua atu nei mafutaga faaleaoaoga i nisi pitonuu o loo iai le mamalu o le atunuu e pei o Liverpool, Mt Druitt i Sisifo aemaise Bankstown i Sini Sasa‘e. O loo fuafuaina nei se semina o sosoo pe a uma atu le faamanatuina o le Tutoatasi i le amataga o Iuni ma sosoo atu ai le faasoaina o lenei silafia.
O se taualuga mataina o lea faamoemoe o le uma lea o le aoaoga ae tufatufaina ai foi ma nai Tusipasi o sui auai ma aotauina i lenei faamoemoe e faapine ai lo latou auai.
O se vaega lea e talitonu le La‘u Samoa o le a faatupulaia ai fuainumera o ni sui auai i isi Semina o fuafua mai auā o lea ua silafia e sui auai muamua nei le aogā ma le tāua tele.
