O fono faasavali a le SSIG na afua ai se manatu e faavae le Vaega Faaupufai ua resitalaina nei

O fono faasavali a le SSIG na afua ai se manatu e faavae le Vaega Faaupufai ua resitalaina nei

E ui ina ua mae’a ona resitara aloaia le vaega faaupufai fou o le Samoa First – Faamuamua Samoa i le Ofisa o Faiga Palota mo le faigapalota tele a le atunuu i le 2021, peitai o loo fetotoa’i pea totonu o le vaega faaupufai i ona sui i le igoa e tatau ona faaigoa ai le vaega faaupufai fou.

Ua faaalia e se tasi o sui o le vaega faaupufai, ua tele manatu ua faaalia e tatau ona sui le igoa, e mafua ona o loo faaaogāina e le Iuni o faatāuaina aiātatau o tagata faigaluega le Samoa First Union, le igoa Samoa First i Samoa.

O nisi foi ua faaalia o latou manatu, ia toe sui i le SSIG Samoa First le igoa o le pati.

Peitai na saunoa se tasi o sui o le vaega faaupufai, Feagaimalii Toomalatai Bruce Uta’ile’uo, o le faamuamua i le taimi lenei o le tali atu lea i manaoga o loo momoli mai e le tele o itumalo faapalota o loo asia e le polokalame i tua i nuu ma afioaga.

“Ua toatele tagata o le matou oo atu lava i lea itumalo fai mai ua mananao e sui le faigamalo. O le manumanuga oloo feagai ma tagata o le atunuu, o latou fanua faaleaganuu, lea oloo finauina le toe sui o le tulafono o le eleele o le atunuu 2008.”

Saunoa Feagaimalii e le mafai ona lagonaina siufofoga o le atunuu, ma mea o loo mananao mai iai se’i vagana ua faatu se vaega faaupufai e momolia manatu ma finagalo o loo alalaga mai ai le atunuu.

O sui faavae o le Vaega Faaupufai fou a le Samoa First

O sui faavae o le Vaega Faaupufai fou a le Samoa First

“E manaomia se pati malosi, e latou te faataunuuina le manaoga o le atunuu.”

Ina ua fesiligia le taitai o le atunuu Tuilaepa Lupesoliai Sailele Malielegaoi, i sona finagalo i le pati fou, na ia faaalia o ia e matuā leai se popolega i le pati. “E matuā leai lava so’u popolega iai, manatua foi sa iai isi vaega faaupufai sa fai muamua ma le faamoemoe lava ia sui le faigamalo, o le tulai mai o le pati fou lea, masalo ua atoa iai le 9 o pati, sa tatau la ona faaigoa o le pati lona 9.”

“Ou te le o malamalama foi i le igoa na e faaigoa o le Samoa First, e iai le New Zealand First i Niu Sila, e iai le pati e igoa o le Fiji First, a’o lea ua toe feosoi atu foi ma le latou igoa o le Samoa First, o lona uiga la ua feosoi kopi fua i isi igoa mai Niu Sila ma Fiti, ae ua lē o ane e fai so latou igoa.”

Saunoa Tuilaepa, o se mea lelei le faatu o ni vaega faaupufai e latou te agaia le malo, auā o iina e mafai ona fau fau a’i se malo malosi. “Ae pau le fautuaga, afai ua faatu lea vaega faaupufai, ia alolofa fai faalelei, fai ia mautu, poo ai o iai i totonu o le pati fou lea, ia se’i silasila lelei le tagata ia te ia lava ia poo faape’i, auā o le mea sa’o lava ia e tulai mai loa i le faigapalota, amata loa ona mapuna ane i luga mea lililo a le tagata o loo taotaomia, ma ia sa’o lava latou faamatalaga e fai, auā o le atunuu lenei, e pepelo loa ma lē taunuu se folafolaga e fiu e toe taumafai atu ua leai.”

Peitai e lei pa le fana o le faigapalota o le 2021, ae o lea ua foliga mai ua iai nisi ua mananao e sili ona toe sui le igoa o le pati, o nisi ua faaali i luga o le facebook, o latou manatu, sa tatau lava ona taofiofi le lesitalaga se’i mae’a ona mautu lelei le igoa.

O Feagaimalii o le uluai sui o le vaega faaupufai ua faalauiloa faalauaitele lona momo’e i lalo o le tagavai o le Samoa First. Ua 64 tausaga o lona soifua, ma sa galue i le kmaupani vaalele a le Polenisia mo ni tausaga se tele ona malaga lea ma lona aiga i Ausetalia. Na toe taliu mai i Samoa, ma o loo fai lana ia pisinisi faafaufautua mai i lona aiga i Magiagi.

O lona manaoga, e momo’e mai i Vaimauga Sisifo lea oloo nofoia le nofoa faapalemene e le afioga i le alii faipule, Lenata’i Victor Tamapua, o le minisita lagolago o le ofisa o faamasinoga. O Vaimauga Sisifo e aofia ai Tanugamanono, Magiagi, Fagalii Uta, Vaivase Uta, Toomatagi, Vailele ma Tanumaleko.

Faamaonia e Saunoamalii, e toavalu suafa na tuuina atu i le resitalaina o le vaega faaupufai e aofia ai le susuga i le faifeau o le Ekalesia EFKS, Rev Falefatu Enari, Sililoto Punefu Enari, Sala Tuiletufuga, Fesuiai, Feagaimalii Bruce Toomalatai Uta’ile’uo, Sa’u Joe Brown, Afamasaga Tamana Uelese, Pa’u Tafaogalupe Mulitalo, ma Lealailepule Kolose Auvaa.