Mamalu le Aso o Tuaa Sinasina i Melepone i le Afio ai o le Komesina Maualuga

Le paia lasilasi o Samoa na potopoto i le Aso mo Tuaa Sinasina i Melepone ma le Fono Faufautua mo tagata Samoa
Le paia lasilasi o Samoa na potopoto i le Aso mo Tuaa Sinasina i Melepone ma le Fono Faufautua mo tagata Samoa

O le faatauaina o nai tuaa sinasina na faataunuuina ai le faamoemoe o le Fono Faufautua mo tagata Samoa i Vitoria i le Aso Toonai talu ai, ma valaaulia faaaloalo ai e afifio ane e fiafia faatasi ma faafetaia le agalelei faasoa o le Atua i o latou soifua tulu’i ma le faafualoa i lenei foi vaitaimi o le soifuaga.

O le lona lua ai lea o faamoemoe fai nei a le Fono mamalu mo tuaa sinasina i lenei tausaga, na faatinoina i le masina o Me i le ituvai i Matu o le aai o Melepone, a’o lea ua faatinoina i le itu i Saute pei ona iai le Aso Toonai.  Na amata lava foi i le sulaina o le alofa o le matai sili i le lagi e pei ona taitaia ai e le susuga i le faafeagaiga ia Rev Anesone Tavu’i le sauniga lotu.

Na sosoo ai ma le avausu a tamalii ma faleupolu ma faataunuu ai la latou pitolaau i saunoaga faafeiloai a le Fono e pei ona saunoa ai le fetalaiga a Lufilufi le tofa ia Taugaileula Luafalealo.

Afioga i le Komesina maualuga Henari Petana (ogatotonu matatioata) ma nisi o faletua ma tausi sa auai i le faamoemoe
Afioga i le Komesina maualuga Henari Petana (ogatotonu matatioata) ma nisi o faletua ma tausi sa auai i le faamoemoe

Sa talifuaitau le fetalaiga a Asiata na malaga mai le aai o Sini, ona patiava lea auā malo afifio mai pei ona sa talimalo faaaloalo ai i le afioga i le Komesina maualuga o Samoa i Ausetalia le afioga ia Henari Petana, ae tainane le paia lasilasi i tupu ma tamalii faapea tapaau ma tulatoa o Samoa, a’o le nofo a faleupolu, faapea faletua ma tausi.

Ona sosoo loa lea ma le malu o le taeao, sa taumamafa fiafia ai nai tuaa matutua i taumafa faa-Samoa e pei o le vaisalo, suafa’i ma le kokoesi, ona faagasolo lea o pesepesega faa toeaiina i aso ua te’a, sosoo ai loa ma faafiafiaga a autalavou ma ausiva sa valaaulia, ae vasa’i i faleaitu ma faafiafiaga ale aufaimea malie. Sa atofaina le taimi mo le saunoaga a le afioga i le Komesina i mataupu faavaomalo e lua aemaise o galuega fesoasoani a Ausetalia mo si o tatou atunuu.

Sa tatala foi le avanoa na saunoaina ai fesili a tuaa sinasina i le komesina i nisi o mataupu sa fia malamalama ai, ona alo lea i le taumafataga o le aoauli, pe o le itula e tolu na faatino ai saasaaga faa-Samoa ma faia ai ma le taualuga e le afioga i le Komesina, ona alo lea o le Fono mo la latou faatamalii mo le Komesina maualuga pei ona avea ai le fofoga o Seiuli Alefosio ma sui o le Fono.

Sa saunoa faafetai le afioga a Henari ma faamanuia i alo ma fanau a Samoa i Melepone, saunoa faafetai i tuaa sinasina aemaise o lana faafetai faapitoa i le Fono mamalu a Samoa i Votoria. Sa fofogaina le Lo ta Nuu, ma ta’ape ai le filialii ma le viiga sili i le Atua.