Aumalaga ale MFH e faafou le fale ose tasi o aiga ole sui ole mafutaga

Aumalaga ale MFH e faafou le fale ose tasi o aiga ole sui ole mafutaga

Atonu e leai se tasi na malaga mai i Samoa mo Niu Sila e lei faia ni folafolaga i o latou aiga i Samoa e faapea, “Faatali atu se’i o i Niu Sila e sailiili se manuia  mo le tatou aiga.” Ose tala masani ai ona faaleo i taimi o faamāmā avega, ae o lona faatinoga e tele tausaga faatoa tino mai ia folafolaga, ae o nisi e faavavau lava amene e leai lava se mea e tupu.

Ole Aso Lua 26 o Iulai lea ua fuafua e taunuu uma ai tamā ole mafutaga ale My Friendship House e faataunuu lea folafolaga ise tasi o aiga mai le afioaga o Vailoa Faleata, e faatino le latou poloketi fesoasonai muamua i Samoa, e ala lea ile toe faafouina ole fale ose tina oloo faamuli mai i lo latou aiga Samoa.

Ose tasi o alo ole atunuu oloo i lea mafutaga ale MFH e lei finagalo e faailoa lona suafa, sa fanau ma ola a’e i Niu Sila i lona olaga atoa, ma ua tele ni faamanuiaga ua ia maua ona ole filifiliga a ona mātua e malaga mai i Niu Sila.

Ise faatalatalanoaga ma lea alii na ia ta’ua ai, “A ou toe tepa i Samoa ile mea na ola a’e ai ile faigata ole olaga, na taumafai o’u mātua matou e malaga mai i Samoa e saili se manuia mo lo matou aiga.

“Ua ou maua le manuia ona o lea filifiliga poto ma le saili malo o nai o’u mātua. E ui la na ou fanau ma ola i Niu Sila, ae e le mafai ai ona aveesea Samoa ma lou loto”.

“Oute susue lo’u faamalama ma tepa i Samoa ile mea oloo iai lo’u faasinomaga e ui na ou fanau i Niu Sila”.

Na ia ta’ua foi le tele ole suiga ua iai nei, “A’o soifua mai nai o’u mātua, e taugapa lava i Samoa, peitai ua mavae atu i la’ua, ua lē o toe iai lea sootaga ma aiga i Samoa”.

Na ia faailoa foi, “Ole augatupulaga lua na fananau i Niu Sila lea oute iai, ua le o toe malosi foi so’u sootaga tele i Samoa ina ua mavae nai o’u mātua, ose popolega lea ia te au, ona o a’u ole Samoa e iai lo’u faasinomaga, e iai lo’u aiga i Samoa, oute toe fia foi lava e fausia lo’u aiga ise tulaga lelei”.

“Ose feau tāua foi lea mo soo se tagata Samoa na fanau i Niu Sila, ia toe tepa i aiga oloo tapuai mai i Samoa, e ui ina faigata le olaga i Niu Sila, ae aua ne’i galo le mafuaaga na saili manuia mai ai i Niu Sila nei ole toe atinaeina o aiga i Samoa”.

Na ta’ua e se tasi o tamā ole aiga lea ole a agai iai le ekalesia ale MFH e toe lipea le fale, na ia ta’ua ai, “E le ose moge oso le mafuaaga o lea poloketi ua unaia ai e lea alo ole atunuu e toe totō le fatu i lona aiga i Samoa, ae ose moemitiga na faaosofia mai ele Agaga Paia ole Atua ina ua toe foi Neemia e fausia le pa o Ierusalema ina ua solo i aso e limasefulu ma le lua. Ina ua fofola ele susuga ia Ben lea moemitiga ise mafutaga a tamā oloo faatasi atu ai le My friendship House (MFH).

Sa talisapaia uma ele mafutaga ma lagolagoina lea poloketi e ala lea ile foaiina ole tele o mea e fai ai le galuega o moavao, TV, ili ma le tele o mea faigaluega ae le gata i lea ole toatele ua totogi foi o latou pasese mo le silia ile vaiaso e malaga ai e fesoasoani ile galuega i Samoa. Ta’ua ele taitai ole mafutaga a tamā ia George Prescott “o lea poloketi ose amataga ole tele o poloketi oloo nofosauni le MFH e lagolago ile lumanai mo aiga o alii ma tamā oloo faatasi atu ile mafutaga ale au uso”.

“Faafetai i lea uso mo lea poloketi ma le faasoa mai foi e tatalo ai le mafutaga a tamā ua mafua ai ona loto tasi uma le mafutaga e lagolago aua le viiga ole Atua, faatasi ai ma le taua o lona mafuaaga oloo taatia ai i tua, ole toe tatai lea o loto o fanau a Samoa i Niu Sila i Samoa, le mea oloo iai o latou faasinomaga”

Ose tasi o alii palagi ia Michel mai le mafutaga a tamā na muamua totogi le pasese ina ua falalogo ile poloketi faapea Marcus ma Antony faatasi ai ma le susuga Siaosi Vaili, se tasi o alo ole atunuu sa taalo ile Manu Samoa i tausaga ua mavae.

E toaiva le aumalaga atoa, ole faanaunautaiga ina ia fesoasoani ile auuso ua taimua e toe totō le fatu i lona aiga i Samoa faatasi ai ma le toe unaia o tagata Samoa e lulu le fatu i o latou aiga i Samoa ile mea oloo iai lo latou faasinomaga, aemasise i latou o e na fananau i Niu Sila.

E lua vaiaso ole galuega oloo malaga atu ai nei le au uso MFH i Samoa e toe faafou le fale o lea tina i Samoa e lei mafai ona faailoa mai le Suafa, ae ole faanaunautaiga ia mauluga le viiga ole Atua i soo se mea tatou te faia, taua e Prescott.

Ole toe valiina ole fale, fai le fale le ta’ua, fausia le tane vai, ma le teuina ole fanua, o galuega ia ole a alo atu iai le MFH e faataunuuina. Ua faaigoa lea poloketi ole Parcel 59 ole numera ole faafanua oloo tu ai le fale ole aiga i Vailoa.

Ose itu ua faafetaia ai e lea alo o Samoa oloo i lea mafutaga le au uso oloo latou mafuta faatasi ai “Oute faafetai i nai ou uso ole MFH ile latou lagolagoina o lau poloketi e ala lea ile toe faafouina ole fale ole tuafafine o lou tamā oloo faamuli mai ile matou aiga i Samoa.” “Oute lei manatu ole a latou fesoasoani mai e ala lea i meafaigaluega ma le tele o mea ua faatau mo le matou aiga i Samoa faatasi ai ma tupe sa o latou tuuina mai ia te au e faatau ai mea e moomia mo le galuega.” E lei faailoa mai le tau aofai o lenei galuega, ae ua silia ile sefulu afe tala Niu Sila ua faaaluina i Pasese ole au uso.

Comments

comments