Ole toe lalaga mai ai ole tauvaga pese i totonu ole Ekalesia Fono Samoa i Aukilani ose faatofalaiga ua toe malilie autasi uma iai le Ekalesia e toe fai se tauvaga se’i toe silasila iai le ekalesia Fono Samoa ile tele o pese sa fatuina lava e tamafanau, ae se’i fai se tusipese e tuufaatasi uma iai pe lolomi uma ai pese ia ua fatuina mo sauniga.
Ua tele tausaga o faaaogāina ele ekalesia pese ole Tusi Pese ale LMS ma le Metotisi. Ae ua manatu le PIC Fono Samoa ua tele pese ma fatuga fou o lea ua fatuina ma faanotaina ele PIC Fono Samoa ua tatau ona faaaogāina loa ia latou lava sauniga. Ole tele foi ole tāua ole toe lalaga mai o lenei faamoemoe se’i toe saili mai ai pese tuai sa fatuina e nisi o tuaa matutua ole lotu ua fai i lagi le folauga ae ua lē iloa le mea o iai.
Ose tasi vaega tāua i lenei polokalame ole faailoaina lea ole taleni oloo iai i alo ma fanau ole Ekalesia e ala lea ile taina o pese, faanotaina o pese ma fatuga o pese. Ose meaalofa lea oloo taotaomia i totonu ole ekalesia ae le o mafai ona faaaogāina.
Ole faamoemoe lenei, ose polokalame ua leva ona sau a’i le ekalesia ae peitai ua leva ona taoto ma lē toe faia ona o nisi o mafuaaga, ma le pisi foi ua iai le Ekalesia PIC Fono Samoa. Na gata mai lenei tauvaga ile tausaga e 1998, ae o lea faatoa toe fafagu mai auā lava le faamoemoe ua autasi iai le Fono Samoa.
Ole Aso Toonai 22 o Iulai na toe lagonaina ai siufofoga malie o aufaipese eseese o matagaluega taitasi ale Fono Samoa i totonu ole hall ale ekalesia PIC i Ranui. E fa matagaluega sa auai, Matagaluega i Aukilani Saute, Matagaluega i Matu, Matagaluega Sisifo ma le Matagaluega i Sasae. Ile faatulagaina ole tauvaga na ole 3 matagaluega sa mafai ona auai ile tauvaga ae se’i vagana ai le matagaluega a Sasae e lei mafai ona pepese ile tauvaga ona o fuafuaga i totonu ole matagaluega.
Ole susuga ile taitaifono ole ekalesia ia Matafala Koko na ia taitaiina le sauniga e tatala aloaia ai lenei polokalame. Ole susuga ia Nanai Zion Faavae Eli ose tasi o tamafanau ole ekalesia oloo aumau i Ausetalia na ia tusia ma faanotaina le pese tauva lea sa fai ai le tauvaga a Matagaluega, ae o ia foi sa faamasinoina le polokalame.
O vaega ia na togi agai iai le tauvaga, ia paleni lelei leo ole aufipese, ia sa’o le faaleoina o upu ma nota, ia pese mai ile agaga ole pese faatasi ai ma le vaega e tatau ona malolo ai i totonu ole pese, faapea le fesootaiga lelei ale fuataimi ma le aufaipese.
E silia ile 70 tagata e auai i totonu ole aufaipese ale matagaluega ma ose galuega faigata sa gafa ma le alii faamasino. Ole pese ole Choice na filifili lava ele aufaipese latou le pese e fiafia iai, ma e fitu aulotu sa auai i lea tauvaga. Ole aulotu mai Papakura, Manukau, Satauro ole Faaolataga, Newton PIC, Glenfield PIC Avondale PIC, Glen Eden PIC. Ole aufaipese a Tamaki e lei mafai ona auai ile tauvaga, ae sa usu le latou pese e aualofa ai ile latou tama faaleagaga ia Rev Elder Leiite Setefano, ma nisi o latou pese na fatuina ele susuga ile faafeagaiga a’o lei maliu. Na mae’a le tauvaga ona usuina faatasi lea e matagaluega uma ole pese tauva lea na tusia ele susuga ia Nanai Zion ae taina foi e lea alo ole ekalesia.
Iuga ole Tauvaga
Pese tauva i Matagaluega na sola ai le Matagaluega a Aukilani i Saute ma le tulaga muamua, tulaga lua Matagluega Aukilani Matu ma le tulaga tolu ole matagaluega a Aukilani Sisifo. Pese filifilia (Choice) na manumalo ai le aufaipese mai le PIC Newton, (2) PIC Manukau (3) PIC Papakura.
Ua mae’a le faamoemoe na alo atu iai le Ekalesia Fono Samoa ile toe fafaguina ole tauvaga pese i lenei tausaga ma ua autasi foi la le Fono Samoa e tai lua tausaga ma fai lenei tauvaga, aua ole isi tausaga e fai ai le fono tele ale ekalesia ae ole isi tausaga e fai ai lenei polokalame.
Tele se sao ma le taua ole toe faamanatu o lenei faamoemoe sa iai ile Aso Toonai, ua toe faamalosia ai tupulaga talavou ile faaaogaina ole taleni pese ma le fatuina o pese aua viiga ole Atua.
Ina ua mae’a foi le tauvaga, ua toe silasila ai foi le Fono Samoa ile isi tauvaga o lumanai, e fai ai se tauvaga mo tupulaga laiti, ma le tauvaga mo tagata matutua, aemaise ai o maka ile tuufaatasiga atoa poo le aotelega.
