O vaaiga eseese na molimauina e mātua mai atunuu eseese i totonu ole aoga tulagalua a Bailey Road i Mount Wellington ile afiafi ole Aso Lua male Aso Lulu ole vaiaso talu ai, a‘o faatino e fanau mai atunuu taitasi le tāua o a latou aganuu i totonu o lea aoga.
Sa faailoa ai foi le galuega fita a faiaoga sa nafa male a‘oina o nei aganuu aemaise ai o togiga poo laei a atunuu taitasi sa laeiina lea ele fanau. Ua suifefiloi gagana ma musika faapea foi i lanu o tagata o atunuu eseese sa molimauina lea faamoemoe. E lua po na faatino ai le faamoemoe, sa amatamea ai lava tagata Whenua e pei ona masani ai polokalame i totonu o lenei atunuu, ona faasolo ane lea i atunuu taitasi. Ole isi itu tāua o lenei faamoemoe ole galulue lea o fanau ile faasoasoaina ole polokalame atoa e aunoa mase leo o faiaoga se‘i vaganā ai le susuga ile alii pule ia Mr Stassord Bush, o ia lea sa fai ma sui o faiaoga e faafeiloaia le mamalu ole auvalaaulia ma mātua sa molimauina taumafaiga ale fanau.
O Samoa e lua ana kulupu sa vaevaeina iai. O fanau laiti lea sa vaai ele susuga ile faiaoga, le afioga ia Fonoti faapea ma nisi o mātua sa lagolagosua iai, sa latou faatinoina le mauluulu e aunoa mase mea faili ae pepese lava tamaiti ma fai taga, ua toe fafagu mai ai faafiafiaga i aso la i toeaiina ma loomatutua e ta le fala ma pepese ma sisiva.
Ole vaega o fanau matutua (senior) sa latou faatinoina le siva sasa faatasi ai male mauluulu lea ua tele ina faatinoina i ona po nei e faaaogā ai CD pese ma sisiva ae faaiu ai ile taualuga lea sa saasaa ai le alo ole susuga ile faafeagaiga ia Sega. Ole tāua lea ole polokalame ale fanau, ole toe silasila lea o mātua matutua Samoa sa auai ile toe fafagu male faamanatu a fanau ile eseesega o siva e usufua pese e aunoa ma ni mea faili, ma siva faaonaponei ua faaaogā ai musika eseese, ma ole kulupu Samoa foi sa latou taualugaina nei polokalame.
Ile finagalo ole sususga ile alii pule ia Stassord Bush, male komiti faafoe oloo latou faamalosia le faatāua ole aganuu i totonu ole aoga tulagalua ina ia mafai ona malamalama fanau i gagana, tu ma aganuu a lo latou lava atunuu, auā ole tele o nisi o fanau ua omai i Niu Sila nei, ua malosi ai le aoaoina ole gagana peretania ma ua tauau ai ina lusi le gagana ma measina a lona atunuu e pei ona ola mai ai, ma ole mafuaaga foi lea o lona naunau e faatino lenei polokalame i tausaga taitasi.
E tolu masina sa nafa ai faiaoga ma fanau ile aoaoina o nei polokalame ma lagolagosua iai nisi o mātua.
