E lei puaoa le lagi ina ua faataunuuina sauniga faamavae ile usugafono ale Tofa ia Matia Veletaloola Faleao Moetoto Semu, ona ose aso lagi lelei lea ole vaiaso atoa talu mai timuga male malosi ole savili ile Laumua.
Ole Tofa ia Veletaloola ose tasi o tiakono ma ose A‘oa‘o Fesoasoani o le ekalesia PIPC i Porirua, na ia tautua ai male faamaoni ile finagalo ole Atua moni tausaga se 4 e pei ona molimau e lana Faafeagaiga le susuga ia Perema Leasi na taitaia lona aso faaleaiga ma lona toe sauniga ile Aso Gafua 19 o Setema.
E telē le aogā o lenei tulafale ile tausiga o lona aiga i Samoa faapea foi ma Niu Sila nei e pei ona molimau lona tuafafine o Folole UilaefaTuiloma, o lē na faatagaina lenei lipoti mole Samoa Times. Osi ona faletua poo le tausi ia Ruby Semu ma lana fanau ma sui ole aiga na molimau i lona fai aiga lelei male tuatua faamaoni o Veletaloola isi ona aiga i Samoa. Sa fai ma sili‘aga ole aiga i soo se mea, ma e manatua pea ana galuega lelei.
Sa tautua lenei tamā ile malo o Samoa ile tofiga leoleo ma na oo atu lava ile Satini Sinia lona tulaga a‘o lei tuua Samoa mo Niu Sila nei. E toatele na molimauina lona faamaopoopo i aulakapi ale Malisi i Apia ma o lana taaloga foi lea sa toatele i latou na latou silafia ai lenei tulafale i lona talavou.
Na aoga o ia ile Kolisi o Samoa ma ose tasi o sui tautua faamaoni ole SCOPA. E lua ona suafa matai (Matia ma Veletaloola) mai le aiga osi ona tina i Vaitele i Faleata, ae Faleao mai le aiga o si ona tamā i Satupaitea. O lana mavaega lava isi ona tausi ia Ruby ina ia aumai se tasi o lona aiga mai Samoa e faia lona toe aso, ma ole Tofa ia Toi Sakaria Taitu‘ave na malaga mai lava i Samoa e tali le finagalo osi ona tausoga.Matagofie tele faaaloaloga a aiga na lua e tusa o tulaga o mea faapenei, lea na tatala ai ‘auafa ma ie ole malo matagofie ma tauaao ai i faaaloaloga masani i palapala a malo ma tupe e pei o tu ma aga faaaloalo e masani ai Samoa, i Ao o Faalupega faapea lana ekalesia, male mamalu ole Usoga sa faatasi ai lea aso.
Avea foi lenei avanoa e momoli atu ai faamafanafanaga ile tausi ia Ruby male nofoaalo, le tuafafine, le Tina malolo faaeaina ia Folole Tuiloma, le fetalaiga ia Toi Sakaria Taitu‘ave, faapea le mamalu i aiga na lua.
E momoli atu foi le agaga faafetai tele e tusa ole matagofie o tapenaga uma mole toe aso ole Tofa ia Veletaloola. Ia faamanuia tele atu le Atua.
