E lei mafai ona tatala ane e leoleo le avanoa e molimauina ai e tusitala le feiloaiga a le Komesina ma le vasega o taitai leoleo, lea sa auai ma le Palemia o le Minisita o Leoleo ma le Minisita lagolago. Ae ina ua fesiligia le Palemia poo a mea na fai ile feiloaiga o lana tali lea, “Ioe ua uma ona feakisi ma faalelei, o lea ua fai le galuega a le faamasinoga ua le faamaonia moliaga o le Komesina o le mutaaga lena o le mataupu”. O le amataga o le vaiaso nei na faatoa fono ai le Komesina ma le Matagaluega atoa, ile tuanai o le vaiaso ua mavae sa toe taliu atu ai e faaauau ona tiute.
O le finagalo o le Komesina i fesili a tusitala na ia faaalia ai ua lagona lona fiafia ina ua toe foi atu e faaauau ona tiute i lona naunau e faatino lana tautoga ma tuli i luma se ‘ai lelei o le matagaluega o leoleo.
Na fesiligia le Komesina i sana silasila ile feteenaiga o loo iai lagona o nisi o leoleo ma lana faafoega o le matagaluega e pei ona mafua ai se tusi na saini aao ai ni taitai leoleo ma ave ile kapeneta.
Ae na tali le afioga Fuiavailili o mea na tutupu e tatau ona lafoai loa ae tuli i luma se tulaga lelei ile fealofaniga o leoleo uma aemaise lava i lona va ma le pulega ma le lautele o le matagaluega.
O le faamavae o le Komesina lagolago le afioga Afamasaga Michael So’onalole e leai se sootaga ma le mataupu na faamalolo ai le Komesina, ae na faaalia e le Palemia o le faamavae o le taitai leoleo le susuga Luatimu Samau ma le tamaitai leoleo satini sinia o Siripa e mafua ona ua iai nisi galuega o le a tautua ai.
O Luatimu sa faia le suesuega na mafua ai moliaga e silia ile 200 na molia ai le Komesina ae o Siripa na faia le suesuega na molia ai le Komesina ini moliaga se fa e mafua ile taunuuga o suesuega a le Komesina o Sulufaiga ile faasea a Suitupe Misa ile osofaiga a leoleo na loka ai o ia ae leai ni molimau e faamaonia ai lona umia oni laau malosi ma ni laau faasaina.
O le Komesina lagolago le afioga Samoa Mulinuu Mulinuu o loo faaauau pea ona faamalolo, ma le leoleo taai lua o Hillary Eteuati. O loo talia le taimi e faia ai le komisi suesue e suesueina ai ni tuuaiga o loo aafia ai le Komesina lagolago ma le leoleo ta’ai lua. Talu mai le faamalolo le tumau o le Komesina ma suia le minisita o leoleo o lea ua iai se faaiuga a le kapeneta o le a soloia ai tofiga Komesina lagolago ae toe foi ile tulaga sa sau a’i muamua e nao le tulaga o le Komesina ma le Sui Komesina o leoleo.
O le tausaga e 2019 e faatoa maea ai konekarate tolu tausaga a Komesina lagolago ma o le taimi foi lea e muta ai ma ia tofiga faaleoleo.
