O le vaitau o le 1980 na amata faalogoina ai le suafa o Uelese Petaia o se tama fanau a Samoa ua autu iai ni ata tifaga. O le ata o le Sons for the Return Home na muamua silasila ai le atunuu i lea tamalii ua suafa matai ile Tuiasau ma le Leota.
Na faasolosolo mai ai lava lena taimi sa iai foi sana galuega ilea ta faasolo televise a Ausetalia le ABC na latou pu’eina i Samoa le tala o le alii tusitala Sikotilani o Lopati Lui Sitivinisone. O le ata tifaga o le Flying Fox in the Freedom Tree sa iai foi lana galuega tau ata tifaga sa faatino ai.
O se tasi o taimi galue o lea tamalii sa auauna ai ile tomai faatusitala ma sa taunuu lava ina filifilia e le Malo e avea ma Pule o le Faletelevise a le Malo o le TV Samoa i Mulinuu, mulimuli ane faatu lana pisinisi televise ae na aafia ini faaletonu tau tupe ma toe tapunia ai. Sa faafaigaluega e le Ekalesia EFKS ile tapeina o le televise a le ekalesia ma avea ai Tuiasau ma uluai Pule Sili o le EFKS TV seia oo ina faamuta lana tautua.
O le toe foi o lenei tamalii e faaauau lona tomai ile faatinoina o tala i ata tifaga e pei ona auai ilea ta tifaga o le Maea e afe poo le One Thousand Ropes na faaalia ai e Tuiasau o lea ua toe foi ile galuega e tatau ona iai.
“Ua ou iloa lava o le faasinomaga lea o a’u, ae oute faafetai i le susuga Tusi Tamasese ma lona tomai o se tagata e tusia tala ma faatino i ata tifaga o lea ua maua ai galuega a nisi o tama fanau a Samoa e pei o a’u”.
O le susuga Tusi Tamasese o le Faatonu o le ata tifaga o le Maea e afe le One thousand ropes ma o ia foi na tusiaina le tala. O le isi ata tifaga sa faatonu ai le susuga Tusi o le Tulafale poo le Orator. I le feiloaiga a Tuiasau ma tusitala ma sa auai ma nisi o loo ilea ta faapea le Faatonu sa faailoa ai le uiga ma agaga o le tala ua aumai e le ata tifaga o le One thousand ropes.
O se tala e tele ni manoa o loo fesootai ai le olaga ose aiga e aafia i faafitauli o sauaga, le va o matua ma fanau ae o le olaga atinae o se aiga. E tele a’oa’oga o le tala e pei ona saunoa le Faatonu le susuga Tusi Tamasese. O le aso Tofi o le vaiaso nei 23 o Mati 2017 o le a faaali ai faasolosolo ai e le fale tifaga o le Apollo le ata o le One Thousand Ropes.
