“O le isi itu ua matou lē fiafia ai, ua faataga e le ofisa o femalagaa‘iga a le Malo ona alu ese ma Samoa le isi matai matua o Tanugamanono o loo aafia i le totogiina o le taui”…Afu Faumuina
O le taui tupe e silia i le $800,000 tala ua faatonuina nisi o matai o le nuu o Tanugamanono e totogi i le aiga o Faumuina Tutuila ona o a latou meatotino na faaleagaina, ua toe aafia i nisi faaletonu ma ua faanoanoa ai le aiga.
O aiaiga o le totogiina o lea taui, e ono masina e lē mafai ai ona tuua Samoa e matai ua faasino tonu i ai le finagalo o le faamasinoga. O lea ono masina na amata mai i le masina o Iulai 2014 e oo mai i le tau amataga o le masina o Ianuari o le tausaga nei 2015.
Peitai na maua i sailiiliga a le aiga e iai le isi matai na mafai ona alu ese ma Samoa i le aso 24 o Tesema 2014. “Ua matou maua tala mai nisi o le aufaigaluega a le ofisa o femalagaa‘iga a le Malo, na faataga e le Pule Sili le alu ese o le afioga ‘Afa Lesa poo Samau ‘Afa Lesa”, o le faamatalaga lea a le tina o Afu Faumuina, o se tasi o alo tamaitai o le afioga Faumuina Tutuila.
“O lea foi ua matou talosaga i le faamasinoga mo se tusi saisai e totogi mai ai isi masina e lua o le matou taui tupe ona ua misi e lei totogia”. O le masina o Oketopa o le tausaga ua mavae 2014 na maua ai le uluai totogi o le taui tupe e $7,000. Peitai o Novema ma Tesema o le tausaga lava na tea nei e lei avatua se tupe.
O lea foi ua savalia nei le masina amata o lenei tausaga e lei oo atu lava se seleni. Faaalia e Afu sa tatau i le ofisa o femalagaa‘iga a le Malo ona usitaia le faaatonuga a le faamasinoga sa tapu ai ona tuua Samoa e se isi o matai o loo aafia i le mataupu.
E lei manuia taumafaiga mo se finagalo o le Pule Sili le faletua o Vaosa Epa ona sa malaga ese ma le atunuu i le taimi na sailia ai lana afioga.
Peitai o le faamatalaga mai le alii sui pule sili lagolago o loo vaaia le matagaluega a le Palemia ma le kapeneta o loo iai ma le ofisa o femalagaa‘iga, e leai sona silafia i le mataupu seia vagana le Pule Sili ae o loo toesea ma le atunuu.
O le isi mataupu ua lagomia ai lagona o le aiga, ua tala e le Pulenuu a Tanugamanono lo latou fale. Sa faaali mai e le tina o Afu ata o le latou fale ua leai ni apa ma ni laupapa. Fai mai le tina ua i lima o leoleo le latou tagi, ae ua maua ane se faamatalaga e faapea o le tala a le Pulenuu i leoleo, ua faailoa atu e le loia a le nuu o loo mafai ona faatino le talaina o le fale.
“Ou te ofo i leoleo i le tuai ona faia ni moliaga ae o lea ua iai le faaiuga a le faamasinoga, e lē o ta‘ua ai lava se tulaga i le talaina o le matou fale e se isi o le nuu”.
Faaalia e leoleo o loo faia pea suesuega ma o loo fia maua se faaiuga o le faamasinoga e faamautu ai le faamatalaga a le pulenuu o le tala atu lea a le loia e mafai ona tala le fale.
Peitai ua faaalia e Afu e ofo i leoleo i lo latou lē maua o le faaiuga tusitusia a le faamasinoga aemaise e faigofie ona latou fesiligia le Loia sili a le Malo e maua ai.
O le toe aliali mai o nei faaletonu ae e lei atoa se ono masina talu ona mavae atu le iuga a le faamasinoga ua faataatia mai ai aiaiga o le totogiina o le taui tupe e valu selau afe ma ona tupu i le aiga, ua toe sailiili atili ai Afu Faumuina i se isi finauga i le faamasinoga e faasa‘o ai faaletonu ua aliali mai.
