“Ou te alofa atu ia i latou o e alofa mai ia te au, o e sailiili mai foi ia te au, latou te maua au, O loo ia te a’u le oloa ma le mamalu.”
O le Aso Toonai na mavae atu na aofia potopoto ai ona tauaiga, uo ma lana ekalesia pele, e patipatia ma sii faatasi le viiga i le Atua silisiliese, ona ua aulia e lona soifua le 70 tausaga.
Na taitaia e le susuga i le faafeagaiga taulagi ia Titi Magele le sauniga ma faamanuia lona aso soifua, sosoo ai ma le taumafataga matagofie na saunia e le aiga alii ma faagasolo ai tulaga uma o le Aso Soifua.
O le susuga ia Naea Ianuari na fai ma fofoga o le aso, a o le susuga ia Malaesilia Atoaga Aiava na fofogaina le molimau a le aiga mo le soifua o Paepae.
O le viiga ma le faaneetaga e sii atu i le Atua ona o lou soifua tului ma lana faauuga i ou tofi ma faiva, o lou alofa ma lou faatuatua ua matou manuia ai, Faafetai, Faafetai tele lava Dad. Alofagia lou soifua e Keriso maua nisi tausaga se tele e umi ai pea la tatou mafutaga.
Alofaaga o lau fanau ma a matou fanau, faapea lau Ekalesia pele, aemaise o ou aiga uma i Melepone.
