Foliga popole o le Warriors ina ua sosoo sikoa a le Stormers

Foliga popole o le Warriors ina ua sosoo sikoa a le Stormers

Super Rugby

Ua faaopoopo faaletonu i le isi faaletonu ina ua faia’ina ai i le Blues i le Jaguares i lona lava malae i le Aso Toonai ua tea. E 20-13 ‘ai na manumalo ai le ‘au mai Argentina. Ae na iai le faamoemoe tele a le Blues e manumalo i le taaloga lea. Ae o le malosi o le foueti a le Jaguares na faatamoe ai le foueti a le Blues.

E iloa i le faitauga o pue, e 65 pue (tackles) a le Blues i le na’o le 35 pue a Jaguares. Ae o le Jaguares na sili atu le lelei o le faatulagaina o lana ‘au. I le faaiuga na maua ai ma lana sikoa ma manumalo ai e 17.

O le tulaga faaletonu o loo iai le Blues ua fesligia ai e tagata le tatau ona faaauau ai pea ona avea Tana Umaga ma faiaoga o le ‘au, e ui e lē o iai se manatu o le pulega a le Auckland Blues e faia se latou fuafuaga i le alii faiaoga.

I isi taaloga a ‘au a NZ na manumalo ai le Hurricanes i le Sunwolves i Ueligitone (43-15), toilalo le Brumbies i le Crusaders (8-21) ae e tasi le ‘ai na manumalo ai le Highlanders i le Bulls (29-28) i Pretoria.

O le vaiaso nei e feiloai ai le Blues ma le Warratahs i Sini, Ausetalia. E tutusa ‘au ia e lua i le faia’ina i ‘au asiasi. O le taaloga lata mai a le Warratahs na faia’ina ai i le Lions mai Aferika i Saute 29-0. O le a tauva ai poo ai o le a ea le pologa, mo le taimi nei.

O se vaaiga i le taaloga a le Blues ma le Jaguares

O se vaaiga i le taaloga a le Blues ma le Jaguares

NRL ma le Warriors

Na malaga le Warriors i Melepone e taalo ma le Storm ma le faamoemoe o le a toe faaopoopo ma faaauau lana masani o le manumalo i taaloga a le NRL. Peitai, e ese foi le faamoemoe na sau ma le Storm latou, e lei sau le Storm e faia’ina, ae na sau e faamo’amo’a le Warriors. E uma ane le taaloga ua 50 ‘ai a le Storm i le na’o le 10 a le Warriors. I tulaga o taaloga a le Lakapi Liki, o se faia’ina e matuā leaga tele lava. O ‘ai o le taaloga ina ua mae’a le ‘afa muamua e 38 le Storm ae fuamoa le Warriors. E pei ua toe foi i tua i le faaiuga o le 2017  le leaga o le taalo a le ‘au na vaaia i le ‘afa muamua. O le fia sikoa lava o le Storm ma sikoa. Leai ma se laina puipui a le Warriors, e peiseai e leai se naunau o tama i le taaloga.

E matautia le saoasaoa o le taalo a le Storm mai le amataga. Na iloa lelei lava e le Storm e lē o lava se malologa a le Warriors, o totonu o le lima aso na mae’a ai le taaloga mulimuli a le Warriors, ma le taaloga lea ma le Storm.

O le metotia la a le Storm ia matuā faatamo’e le Warriors mai le amataga ia vave ona vaivai. O le mea tonu lava lea na tupu, e lei iai ma se taimi na tau seti ai le ‘au e tali le matautia o le Storm auā na saputu sikoa a le Storm mai le amataga o le taaloga.

Ae e le na’o le Warriors na sosoo ana taaloga. E faapea foi le Dragons lea na taaalo ma le Warriors i i le Aso Toonai, ae na toe taalo foi i le Aso Lulu le Dragons, ae o le eseesega na manumalo le Dragons (24-8 vs Roosters) ae faia’ina le Warriors.

E lima foi aso na va ai le taaloga i tua atu a le Storm ma le Broncos a’o loma le feiloaiga ma le Warriors. E lē mafai la ona alofaga le Warriors i le puupuu o le taimi na tapena ai mo le taaloga ma le Storm i Melepone.

E ui i lea e tatau ona toe ala mai le ‘au i le taaloga o le a soso’o ai. O le Warriors e talimalo i le West Tigers i Mt Smart Stadium, ua tatau ona faagalo le taaloga mataga lea na fai i Melepone, ae toe polesi lelei le ‘au e saili se isi ona malo ile West Tigers.

Faaiuga Super Rugby

Super Rugby

Hurricanes 43 Sunwolves 15

Highlanders 29 Bulls 28

Crusaders 21 Brumbies 8

Blues 13 Jaguares 20

Chiefs Bye

Pts Koneferenisi NZ

Crusaders 33 pts

Hurricanes 32

Highlanders 28

Chiefs 26

Blues 13

NRL

Storm 50 Warriors 10

Dragons 24 Roosters 8

Broncos 24 Rabbitohs 20

Knights 18 Sea Egals 12

Panthers 22 Bulldogs 14

Sharks 10 Titans 9

Raiders 18 Cowboys 8

Eels 24 West Tigers 22

Points

Dragons 14 pts

Panthers 12

Warriors 12

Storm 10

West Tigers 10

Knights 10

Rabbitohs 8

Roosters 8

Sharks 8

Broncos 8