FAIPULE – Afioga Faumuina Wayne Fong

ITUMALO – (Tu Taulaga-Sisifo)

Ole avanoa muamua ole itulau lenei ole Tofi ole Itumalo na faatalanoa ai le sui Faipule mai ile itumalo Tu Taulaga-Sisifo le afioga Faumuina Wayne Fong.E pei ona silafia ole uluai paeaiga lenei mo Faumuina i totonu o Upufai a Malo ma ose tasi lenei o sui Faipule e tele lava ina faaali ona manatu i fonotaga ale Palemene aemaise foi ole tele o mataupu e talanoaina e taitai ole atunuu e oo lava foi i luga o upega tafailagi le social media e pei ole facebook e tatala ai le finagalo o Fong. Ma o fesili nei na mafai ona fesiligia mo le Tofi ole Itumalo.

Fesili: Ole ā se mafuaaga na alai ona e filifili ete tamoe ile tofi ole itumalo?

Tali: Oute lei iloa oute alu ise faigapalota ae ole suiga ole tulafono na mafua ai ona oo mai se manatu oute alu. E lei iai muamua se itumalo lenei ole Tu Taulaga-Sisifo, na’o le Palemene lava o Samoa na o latou silafia le suiga lenei auā ole itumalo lenei na fau mai i totonu ole Palemene. Ole aso 23 o Iulai ile tausaga e 2015 na pasia ai le tulafono mo le itumalo fou lenei ma o iina tonu na faatoa iloa ai oute alu ile faigapalota, o lona uiga a fua atu ia Mati ole 2016 na faia ai le faigapalota tele ale atunuu talu ai, e na’o le valu lava masina na ou tapena ai. E lua lava lu’itau tetele na faafesagai ma a’u ile faigapalota talu ai. Muamua, e lei silafia ele toatele ole itumalo e iai se itumalo faapea ole Tu Taulaga-Sisifo. Lona lua, o sui sa matou tausinio ile faigapalota e le oni tagata faatauvaa ae oni tamalii ua iloga le tautua ile atunuu. Peitai o lo’u tulai mai ile tofi ole itumalo e faafetaia ai le alofa ma le agalelei ole Alii. E sa’o ai foi le faamatalaga ale isi toeaina, E lē iloa a le ku e laki.

Fesili: Ole masina o Mati ole tausaga lenei e atoa ai le lua tausaga talu ona e tulai mai ile tofi ole itumalo. O ā ni atinae ua mae’a ona faataatitia mo lou itumalo?

Tali: E iai fuafuaga alualu mamao ale malo ua mae’a ona faataatia mo le Itumalo lenei, ma ole tele o nei fuafuaga na amata faataatia mai e nisi o sui sa iai muamua e pei o Lealailepule Rimoni Aiafi. Ile itu la tau atinae e leai se mea oute popole ai auā e nonofo uma le toatele o sui ole Palemene i lo’u itumalo e pei ole afioga ile alii Palemia ia Tuilaepa Sailele Malielegaoi, faapea foi le Minisita o Tupe ma le afioga ia Tialavea Seinafolava Hunt, o Faumuina Tiatia Liuga, ma le silia ma le limasefulu o sui Faipule.

Fesili: Ole ā sau fuafuaga alualu mamao ia uma atu le 2018 ua tino pe ua taatia mai?

Tali: E lē o iai se isi fuafuaga ona e foliga mai e lē toe iai se itumalo ole Tu Taulaga-Sisifo ile lumanai, e ui e lei faamaonia mai ile taimi nei peitai ole mae’a ai ole faigapalota talu ai na faagasolo ai loa iloiloga ma faatalanoaga ele komiti faapitoa e autilotilo ai ini auala e faaleleia ai faigapalota mo le lumanai. Sa maua foi lo’u avanoa e faatalanoa ai a’u ele komiti faapitoa lenei ma faaalia iai lo’u manatu, ole mea lea e iai le matou itumalo e pei ose itumalo oni vale, a loto lava le malo e fau se tulafono ae uma foi toe talepe ae sui.

Fesili: Lona uiga la a fua iai, ole lumanai o oe ole Tofi ole Itumalo lenei oloo faalagolago ise faaiuga mai le komiti faapitoa lenei?

Tali: Ia e mafai lava ona autilotilo ile itu ete iloa e lelei ai oe. Manatua foi o lea oute alu ile Faumuina iinei, a’o a’u ia o Gagaifo Lefaga. Ia ona e autilotilo foi lea ile itu lena, pau a le faanoanoaga ole tele o la’u galuega na faataatia iinei, ia ae a oo atu foi ile taimi lena ona taatia lea o lo’u Faumuina ae ou alu i lo’u matai Faleata auā o lea oute Leatinuu mai i Vailoa Faleata.

Fesili: E tatau ona iai se vaega faaupufai e agaia le Malo?

Tali: E tatau, iva sefulu pasene o sui Faipule ole Palemene o sui uma ole HRPP. O matou e lē o aofia ile lisi o Minisita ma o latou lagolago lea ua fau atu ai le vaega e agaia le malo ae lē ose vaega mo’i. O matou lea ua osi ai le taulaga ale HRPP e faaali foi o matou manatu i tulaga e faaleleia ai le malo ae lē mafai ona aveesea ai le itu moni, o matou o sui totino ole HRPP. E iai foi taimi a soona sausau atu lou manatu ae tu mai i luga le toeaina (Palemia) ma saunoa mai, aua le faia mai manatu faavalevalea na, o lona uiga ua lē ta’ua oe ose sui e agaia le malo ae ua ta’u oe ole sui faavalevalea. E lē sa’o uma foi faaiuga e fai ele malo, ma e tatau lava ona iai se vaega e agaia le malo ina ia fai ma siaki ai faaiuga ale malo pe sa’o pe sese.

Fesili: Afai nei ete toe alu ile isi faigapalota, o iai sau fuafuaga ete faatuina se Itu Agai?

Tali: Se pei a ua tau vave mai tele lau fesili e lei taitai oo atu ile isi faigapalota.

Fesili: Ole ā le finagalo o lou itumalo ile mataupu lea i fanua Samoa?

Tali: E leai se popolega tele o lo’u itumalo auā foi ole tele o fanua nei matou te nonofo ai o fanua umia saoloto, e pule a le tagata ia i lona fanua. Peitai o matai oloo nonofo iinei e iai lo latou popolega i fanua a o latou aiga. E oo mai foi ile taimi nei oloo iai lava le nunumi ona oloo tetee foi le isi vaega ile pili lea ale malo e ala ile lisiina o fanua Samoa ile aufaipisinisi. Ae o lo’u manatu oute lagolagoina le pili lea ale malo auā ole tele o tatou fanua Samoa e leai se galuega o faia ai ae afai la e mafai ona lisi atu ole a mautinoa e maua ai se vaega tupe lelei mo lea aiga, e faalagolago lava la ile Sa’o ole aiga ise feagaiga e mafai ona o latou sainilima ai ma lona aiga ile lisiina atu ole latou fanua. E sili atu lena nai lo le tele o fanua o iai nei oloo tumutumu ai Mulinuu i fale faamasino e tau saili ai le pule.

Fesili: Ole tele lava o faigapalota ale atunuu e sauni loa, ona malaga lea ole tele o sui faatutū e fai a latou sailiga seleni i atunuu e mamao e pei o Niu Sila ma Ausetalia. O fea o iai lou finagalo ile palota mai o tagatānuu o Samoa o aumau ai i atunuu mamao poo fafo atu o Samoa. E tatau ona plota mai pe lē alagatatau?

Tali: Tasi lea mataupu tāua tele auā e toatele atu tagata Samoa e aumau i fafo nai lo iinei i Samoa, o lea foi e lafo mai tupe i o latou aiga i Samoa nei. E iai foi lo’u talitonuga e telē a le suiga ole tatou malo pe afai ae palota mai fafo.

Fesili: Faamata ose popolega tele lea ile malo poo le HRPP pe afai ae palota mai fafo?

Tali: Ioe, ose popolega tele ile malo, auā o tagata ia e aumau i fafo e fiafia tele e faaali o latou finagalo i luga ole social media e ui lava o nisi e lalafi mai i tua ae oloo iai lava nisi e faaalia o latou manatu ile tele o mataupu ale malo. Ae manaia foi pe a tatala lea avanoa ise taimi o i luma ae amata palota mai na’o Matai, ae ia palota mai le matai oloo tautua mai lona aiga i Samoa nei, fai lana monotaga faatasi ai ma le malaga soo mai e asi lona aiga. Auā ole toatele o matai o iai nei i Niu Sila e faatoa oo mai lava i Samoa nei pe a fai se faamasinoga. E lē mafai la ona avatu iai ele malo le avanoa e palota mai ai pe afai e na’o le lua vaiaso e malaga mai ai ae limasefulu vaiaso e nofonofo ai i Niu Sila.

Fesili: O ai se isi i totonu ole HRPP ete silafia e faaono suia Tuilaepa pe afai ae lē toe tamoe ile faigapalota?

Tali: Ile taimi lenei e leai a se isi, ua na’o le toeaina lava (Tuilaepa) ona o vaega nei, lona malamalama ma lona atamai ile itu faataitai, polokiki faatasi ai ma le faaaloalogia. O isi uma tagata lea e i tua, ua soona o isi, ua ‘alo’alo isi, ae tafafao isi. Ia masalo atonu e sa’o ai le isi faipule, e lei fanau mai lava le tagata oute faia’ina ai ile palota.

O Faumuina Wayne Fong ose isi lea sui ole HRPP e fiafia tele e faaali lona finagalo, lea foi na ia ta’ua ile tatou faatalanoaga, e aua ne’i taofia lou tautala; afai ete silafia e tatau ona e tautala e faaali lou manatau, ia tautala loa. E ese a le tagata e tautala e faaali lona finagalo, ese foi le tagata e tautala ona ole fiapoto poo le tetee.

E iai le isi tagata e tetee a i mea uma, e oo a i mea lelei ae e tetee lava ae ole tagata e fetāla’i lona mafaufau e tautala ina ia faaali lona finagalo e pei o a’u oute tautala lava ile fono ale Palemene, e oo i fonotaga ale HRPP e faaali lava o’u manatu. O isi taimi oute sau ile matou aiga ae fai mai lo’u toalua se soia ete soona tautala; o la’u tali iai, na ta nonofo mai lava oute fiafia e tautala masalo ana ou lē tautala semanu oute lē maua oe.