O le vaiaso na tea nei na faiaina ai Baby “Pitball” Nansen (Igoa moni, Birthany Katarina Nansen) i lana fusuaga ma Mikaela Mayer. O le fusuaga na fai i le Madison Square Garden i New York, le nofoaga lauiloa i le lalolagi atoa i tala faasolopito o Fusuaga. O iina na fai ai le fusuaga muamua a Muhamad Ali ma Joe Frazier (1971, Manumalo Joe Frazier). O le uluai faiaina foi lea a Ali i le taaloga.
Ae o lea ua ulufale ai Nansen i le Madison Square Garden i lana uluai fusuaga i Amerika. E ono taamilosaga o le fusuaga na manumalo ai Mayer i se faaiuga autasi (Unanimous Decision). E lei tele se avanoa na maua e Nansen i le fusuaga. I le taamilosaga muamua na lavea ai Nansen i le agavale faalava a Mayer.
O le tu’i lea na faavae iai le malosi o le fusu a le tamaitai mai Los Angeles. Mai le taamilosaga muamua na tuliloa ai e Mayer le tamaitai Samoa i totonu o le maea. E ui i lea, na uma lelei taamilosaga o le fusuaga. O faamasino uma e toa tolu na sikoaina le fusuaga 60-54 mo Mikaela Mayer. E ui foi i lea ae e lei vaaia se foliga fefe o Nansen i le fusuaga atoa. O Mayer ua 5 fusuaga leai se faia’ina tolu fusuaga na malo ai i le tu’ioti. O le isi faigata mo Nansen o le umi tele o Mayer ia te ia, ma le uumi foi o lana so’a. E ova ma le afa futu e umi ai Mayer ia Nansen, na faafaigata ai ona mafai ona fusu i totonu le tamaitai Samoa mai Niu Sila (NZ). Ae na viia e tagata faasalalau le toa o Nansen i le to’a o lana vaai i sauaga na oo ia te ia i lima o Mayer aua a na o se isi ua leva ona togi le solo.
Na faaletonu foliga o Baby Nansen i le malolosi o tu’i a le Amerika, na tafe foi ma le palapala mai lona isu. I le taamilosaga lona tolu na pulea ai lava e Mayer le fusuaga i ana tu’i ma ana so’a i foliga o Nansen. I le taamilosaga lona lima na faapea o le a faauma ai e Mayer le fusuaga, ae e lei toilalo ai Nansen. Na finau pea Nansen e faauma taamilosaga o le fusuga. I le faaiuga o le fusuaga na faafetaia ai e Baby lona aiga ma ana uo i NZ ma Samoa i le lagolagoina o ia ma lona faamoemoe, aemaise upu faalaeiau na momoli atu mo ia.
Na ta’ua e Baby o le fusuaga na feagai ma ia o le “matua taua (war) le mea” na oo iai, ona o le malosi tele o lana paga le tamaitai Mikaela Mayer. O le sailia o se tasi e fusu ma Mayer na oo mai ai ia Nansen le valaau mai le pulega a Mayer. Na faafesootai ai Nansen pe talia e ia le fusuaga ma Mikaela Mayer. E ui ina faateia Nansen i le avanoa na maua mai e fusu ai ma Mayer, ae sa sili atu lona amanaia o le avanoa o le a fusu ai i le Madison Square Garden.
O le tolu ai lea o faiaina a Nansen i ana fusuaga e 10. E ono manumalo ma le isi fusuaga e tasi na tutusa. A’o le lima ai lea o manumalo a Mayer, 3 KO’s. O le 2016 na fusu ai o ia i le Rio Olympics mo le Team USA. Na ausia e Mayer le Quarterfinal.
Alex Leapai vs Ben Sosoli
O le vaiaso nei e toe foi ai Alex Lionheart Leapai i le maea, talu ai le fusuaga ma Roger Izonretti i le masina o Tesema 2017. I le fusuaga lea na taofia ai le fusuaga ina ua fetoai le muaulu o Izonretti ma le tuli lima o Leapai ma tafe toto ai le maea i le toto mai le manu’a o Izonretti.
O le faaletonu ina ua fai le faaiuga a faamasino e tutusa le fusuaga. Na faaletonu ai le toe foi o Leapai e saili sona avanoa agai i luga o le Paga Mamafa. O le fusuaga i le aso Tofi nei e feiloai ai ma le isi alii Samoa o Ben Sosoli o Ausetalia. O Sosoli e ono ana fusuaga, ae vaelua tutusa e fa malo fa foi faia’ina. Faatusa ia Leapai ua 41 ana fusuaga i manumalo e 37 ma faiaina e fitu. E fa ana fusuaga na tutusa e aofia ai ma le fusuaga lea ma Izonretti.
