‘E faigata i le tagata ae faigofie mea uma i le faatasi mai o le Atua,’ o le lagona lea o mātua ia Tiatia Ualesi ma lona tausi ia Toetu ina ua taunuu ma le manuia le taumafaiga o le aoga a lo laua alo ia Senerita Tiatia Ualesi Poutoa.
E lei faigofie le sailiga o le lumanai, e tele faigata ma faafitauli aemaise o le fiu e fai meaaaoga, ae lei tuua ai lava le finau ina ia maua se lumanai lelei mo mātua ma aiga. E leai se mea e maua ma le filemu; a lē tigaina le tino ma le mafaufau faatasi ai ma le faalagolago i le feasoasoani mai o le Atua, e lē taunuu le moemitiga ma le lumanai manuia.
O le afiafi o le Aso Faraile, 8 o Aukuso na patipatia faatasi ai e aiga o le tamaitai ia Senerita ma lana ekalesia e pele ia te ia le PIC i Papakura le faamanuiaina o lona taumafai. O lenei faamoemoe na faataunuuina lava i le maota o le matagaluega i Papakura.
Na auai mai ai ona aiga mai Ausetalia faapea ana uo e molimau faatasi lenei aiga fiafia. Na amata i upu faafetai ma le faamalo a le susuga i le faafeagaiga ia Apelu Tielu i le tamaitai ia Senerita ona o lona lototele ma lona siitia o lona aiga i lana taumafaiga e pei ona iai. Na oo foi le agaga faafetai o le faafeagaiga i le tina ia Lina ona o lona tiute faalematua ua mafua ai lenei mafutaga. O le fofoga o le po o le tofa ia Moemalo Fiapito, o le aao tusitusi o le ekalesia le tofa ia Manuo Failautusi Manuo sa fai ma sui o le ekalesia e momoli le meaalofa mo le tamaitai ia Senerita, ae o le tina ia Toetu Tiatia sa fai ma sui o mātua e molimau i le olaga aoga o si o laua alo.
Na sosoo ma le taumafataga na saunia e le faleaiga a Lee Hang i Magele. O se po fiafia i aiga, uo aemaise le ekalesia ona ua iai se tamafanau o le ekalesia ua faauuina i lenei faailoga. O le tofa ia Tiatia Ualesi sa fai ma totoo o le po e momolia se faafetai i le paia o le ekalesia sa auai aemaise o uo ma ē masani na molimauina lenei faamoemoe, a o le tofa ia Leoli Ioane na fai ma sui o le ekalesia e talifaitau i le saunoaga o le po.
O Senerita na amata mai lona olaga aoaoina i le aoga amata e Tumanu Ae Le Tulogologo i le PIC i Papakura faatasi ai ma lana Aoga Aso Sa. Faasolo atu ai i lana aoga tulagalua i Papakura sosoo ai ma le High School i Papakura lava. Na ulufale atu i le Auckland University of Technology i le faaiuga o le tausaga 2009 seia oo ina faaiuina lona taumafai i le amataga o le tausaga lenei, i lona Bachelor of Business in Management.
Na momoli ai foi alofaaga ma faamanuiaga mai ona grandparents mai Samoa ia Lealaisalanoa Valuniu Poutoa ma Lupe, grandma ia Sina Faamoetauloa Solofua i Fasitoo-Tai, o lona grandmother ia Faaofia Toilolo i Gataivai aemaise o aiga uma i Samoa, Ausetalia, faapea Niu Sila nei. O alofaaga mai lona grandmother ia Lina Fiapito i lona taumafai ua faaeaina ai lona aiga aemaise o lana ekalesia.
