“O le mata‘u i le Alii o le amataga lea o le poto.” O lenei mau ua talafeagai ma le alo o le atunuu ia Tyson Tietie e luasefulu tausaga ma ua filifilia nei i le aufili liki a Ausetalia e fili mai aoga maualuluga (tertiary) lea e aoga ai nei i le A.I.M poo le Australian Institute of Music i Revesby, Sini.
E toalima i latou mai Niu Sa Uelese ua ofi atu i lenei aufili malosi o le a malaga taamilo i Fiti i le masina o Oketopa i le tausaga nei.
E taalo o ia i le tulaga o le first five eighth ma o le taliu mai Fiti o le amata tauofo loa i ai kalapu mo lana saini agai atu i le lumanai.
I le taalo a lenei alo e vaaia le mataalia tele i le faasoaina o le polo aemaise kiki i tulimanu faapea le pou faapena foi pe a momo‘e ma osofai. Ae peitai o le mataina o lana pue (tackle) e maofa ai faiaoga ma lana ‘au auā o le malosiaga lea o lana taalo.
O mātua o ona mātua o le susuga i le Faifeau ia Ps Pousigano Tietie mai Falelatai ma Saanapu a o le faletua ia Faatoese Fretton Tietie e mai Fasitoouta ma Savaia i Lefaga. O loo galulue i laua i le AOG Darlinghurst ma o loo faatautaia a latou sauniga i Bonnyrigg i Sini Sisifo. Mai lava i le laiitiiti o Tyson faatasi ma ona uso laiti ia Marvin faapea Pousigano Jr, e taulamua lava i mea e fai a le fa‘ili a le ekalesia faapea le autalavou ma le aoga Aso Sa.
O se mitamitaga lea i mātua ia Eperu ma Seiefu Tietie a o sauni atu ai mo toe masina o aoaoga o le 2014 faapea le uluai malaga taamilo a si o la alo ia Tyson.
