O nisi o upu o le tautalaga faafetai a le tamaitai o Codesa Afelē, “They say it takes a village to raise a child. Well for me, you are my village. My church, my family, my friends and my God. So to say I graduated isn’t right. WE have all done it. WE have all graduated tonight…”
O le tamaitai o Codesa Hana Afelē na faauuina mai le Iunivesite o Aukilani i lona faailoga o le Bachelor of Health Sciences BHSci i le Aso Lulu, 7 Me 2014 ma sa molimauina e ona aiga, uo faapea foi lana faifeau le susuga i le faafeagaiga, Reverend Eperone Futi ma le faletua ia Mafa.
O Codesa o le ulumatua o le fanau teine e toalua. Na soifua ane i Lower Hutt, Ueligitone ma amataina ai lona olaga aoaoina i le Aoga Amata i Naenae, Eastern Hutt Primary School ma le Hutt Intermediate School i Lower Hutt lava. I le tausaga e 2004 na tuua ai le malo e si ona tamā, le susuga i le faafeagaiga Reverend Talolua Afelē a o galulue ai ma lona faletua o Pauai Afelē i le aulotu EFKS Hutt Valley i Lower Hutt.
Na tuua Ueligitone ma malaga mai ma lona aiga i Aukilani ma amata aumau ai i le tausaga e 2005. Na faaauauina lona taumafai i Mount Roskill Intermediate faapea le kolisi o Mount Roskill Grammar seia oo lava ina ulufale atu i le Iunivesite i Aukilani i le 2011 mo lana faailoga o le Bachelor of Health Sciences.
O le Aso Faraile, 9 Me na faatumulia ai le hall a le EFKS East Tamaki i le faataunuuina o le fiafia ma le lotu faafetai a le tamaitai faauu ma ona aiga, uo faapea foi lana ekalesia. O se po sa molimauina le matagofie ma le felanulanuai o pelega o fanau e ala i taumafataga na saunia mo le auvalaaulia aemaise foi o faafiafiaga matagofie na saunia e le Autalavou laiti a East Tamaki.
Na faaalia le agaga fiafia ma le loto faafetai o le tina faapea foi le tamaitai o Codesa, e ui lava sa lagona foi le loto mafatia ona ua lē auai si ona tamā e molimauina lona taumafai, peitai e leai sē fai loto e pule lava le Atua ia i tatou.
Na momoli le agaga faafetai o le tamaitai o Codesa i le tapuaiga ma le fai tatalo a ona mātua faaleagaga Eperone ma le faletua Mafa Futi ma lana ekalesia. Faafetai foi i ona aiga uma – aiga o lona tamā i Gagaifo ma Matautu Lefaga faapea foi aiga o lona tina i Samusu, Solosolo ma Vaega Satupaitea. Na momoli lana faafetai i ana uo sa lagolago ma fai tatalo mo lona taumafai.
Mulimuli ane lana faafetai i si ona tina e ui ina fai i lagi le folauga a lona tamā ae o loo tu malosi e lagolago, faamalosi ma tatalo ia manuia lona taumafai mo le lumanai.
Na faaiuina lea po fiafia i faaaloaloga na saunia e aiga o le tamaitai faauu mo le paia o le aufaigaluega sa auai, aemaise foi le mamalu o le ekalesia i East Tamaki. O le tofa ia Asiata Maifea na fai ma fofoga o aiga ga lua i lea po a o le failautusi a le ekalesia le Tofa ia Laulu Filipine sa fai ma sui o le ekalesia faapea le auvalaaulia e faafetaia aiga ga lua mo le faaaloalo maualuga aemaise pelega o le afafine.
