E $3.6 miliona tala Samoa le tau o le atinae muamua ua faatuina i Samoa e maua ai le malosi faaeletise mai le savili ma le matagi.
O se tasi lea o taumafaiga a le Malo ina ia avea Samoa ma se tasi o atunuu laititi i le lalolagi ma le vasa Pasefika e faatāua ai le puipuia o le siosiomaga ma lo tatou lalolagi, i le saili o malosiaga faafouina poo renewable energy mai ‘oa faalenatura.
O le autu lea o taumafaiga a atunuu laiti mo le puipuia ma le faasaoina o o latou puna‘oa faalenatura mai fesuiaiga o le tau poo le climate change.
O le atinae tau eletise ua tatala nei ma amata faaaogā o le a maua ai e ni aiga e lē itiiti ifo i le 1,400 le eletise mai pou e lua ua faatutū nei ma ua iai ma pe’ape’a e tapiliina mai le malosi o le matagi ma le savili ma gaosi ai le eletise. E lē taugofie lenei atinae i le matau i ai, ae o se isi lea o atinae tāua i taumafaiga a lo tatou Malo, e faaopoopo i isi taumafaiga o loo faatino e pei o le gaosia mai o le kesi e gaosi ai meaai ma ola ai moli mai lau laau lanumeamata ma otaota o meaola faapea toega o meataumafa ua lafoai.
I le saunoaga a le afioga i le Palemia o Samoa e tatala ai le atinae eletise mai le matagi ma le savili na ia faailoa ai i sui o malo o le lalolagi o se isi lea o laasaga au i luma i galuega a le Malo o Samoa e liliu atu ai e faaaogā malosi faafouina e maua mai i natura faalesiosiomaga ma puna‘oa e maua mai i o tatou lava laueleele e aunoa ma le toe faalagolago i malosiaga e maua mai i le suauu ona ua feagai pea atunuu tau atiae ma faafitauli ile taugata o ia malosiaga ua leva tausaga o faalagolago pea i ai.
O le atine ua faatuina nei, o le a maua ai mai le pou e tasi ua faatuina le eletise e tusa ma le 275kilouati, ae o le aofaiga o iunite o le eletise e maua mai ai i pou e lua e 1.5miliona iunite. O le a tuusa‘o atu lea malosi faaeletise i le tautua a le EPC o loo faatino mai isi ana auaunaga o maua mai i afi eletise e maua mai le suavai ma le suauu kiso.
O loo taulai taumafaiga a le Faalapotopotoga o le eletise le EPC ia oo atu i le tausaga e 2018, ua faasopolia le atunuu i le eletise e maua mai i malosiaga faafouina.
