O le mae‘a ai o le taamilosaga lakapi a kolisi maualuluga i Samoa, i le 15 ma le taitoa fitu ma suipi ai le kolisi o Leifiifi, na a‘e ai se finagalo i le afioga i le tamaitai pule ia Sefuiva Malaea Lauano ma le pulega o le ‘au faapea le ofisa o faiaoga, ua tatau loa ona asia e lana aulakapi le atunuu o Niu Sila auā o le atunuu lenei o loo numera tasi i le taaloga i le lalolagi.
O le vaveao o le Aso Sa na taunuu ai loa lenei faigamalaga i lauafanua malulu o Niu Sila, ma o loo faamautu nei i le Ekalesia Metotisi i Papatoetoe i le susuga i le faafeagaiga ia Taeao Matua ma le faletua ia Sera ma le paia i le Ekalesia.
E 76 le aofaiga o le aumalaga e aofia ai le autaaalo e 34, 17 faiaoga faatasi ai ma fanau a faiaoga ma latou aiga na malaga faatasi mai. E tolu vaiaso o loo taamilo ai lenei ‘au i totonu o Niu Sila. E lua vaiaso o loo api ai i le Ekalesia ma le faamoemoe o le Aso Gafua o le vaiaso fou o le a ta‘ape ai i tua i aiga.
O le Aso Faraile na tea nei na mae‘a ai le latou taaloga muamua ma le kolisi maualuga o De La Salle, lea sa matuā faatumulia ai le malae o le Kolisi o De La Salle i le mamalu o le atunuu na molimauina lenei taaloga mataina.
E mae‘a le ‘afa muamua o loo sili ai o De La Salle e 12 i le 7 a Leifiifi, ae amata le ‘afa lona lua, ae osofai Leifiifi ma faateia ai De La Salle, e laititi ae maini. E lei tuumāmāina e le au tino iti, tino lapopoa o le Kiwi, ma mae‘a ane ai le taaloga ua 17 Leififi i le 12 a De La Salle. Ma sa vaaia le fiafia o le atunuu na molimauina le taaloga ina ua manumalo tamafanau mai Samoa.
Ae na ta‘ua e le taitai malaga le susuga ia Tuave Titisu‘esu‘e To‘a, o le lua ai nei o tausaga o malaga mai Leifiifi i ana malaga taamilo. O le tausaga 2004 na siamupini ai foi lana ‘au i taamilosaga a Kolisi maualuluga i Samoa ma malaga mai ai foi i Niu Sila nei, a o avea le susuga ia Falefata Petaia Tuaniu ma puleaoga i lea vaitaimi, ae avea o ia ma faiaoga o le ‘au toe taitaimalaga, o le pine faamau o lea tala, sa iai fanau na filifili sa‘o mai le au a le aoga mo le au taitoafilu a Samoa, e pei o le susuga ia Timoteo Iosua, Paul Peress, Alatasi Tupou, Ron Fanuatanu, Pesamino ma nisi ua lē maua o latou suafa.
O le sefulu ai lenei o tausaga talu ona va, a o lea ua mafai ona toe asia laufanua o Aotearoa ona ua toe suipi foi lana ‘au i le taamilosaga a aoga. O le faamoemoe maualuga o lenei malaga taamilo ia siitia pea i luga le tulaga alualu i luma o le taaloga o le lakapi i alo ma fanau, ae lē gata i lea, ia maua ni sikolasipi mo fanau i ni kalapu ma ni aoga i lenei atunuu.
Na ia saunoa foi e telē se eseesega o le taaalo i Samoa ma Niu Sila nei, ma ua ia maitauina foi e tusa lava pe malo ae tele lava se tāua ia te ia o le feto‘ai ma ‘au a isi atunuu. Ma ua ia manatu foi a toe manumalo i le tausaga fou o le a toe malaga mai foi se isi tua mo Niu Sila.
Pulega o le ‘Au:
Coach: Fouina Junior Samuelu
Assistant Coach: Taleni Tufuga
Management: Reupena Levasa ma Neru Leifi (technical advisor)
Manager: Tuave Titisu‘esu‘e To‘a
Mrs Sefuiva Malaea Lauano (Principal)
