Ua fautuaina ele Malo faauluuluga o matagaluega ma faalapotopotoga uma ale Malo ina ia faaaogā le tautua ale kamupani vaalele ale atunuu le Samoa Airways mo malaga i atunuu mamao. O faigamalaga ia e aofia ai malaga ini fonotaga, a’oa’oga ma isi tiute e fesootai ma auaunaga ale Malo.
Ise pepa o faaiuga ale Kapeneta ua mama i tua oloo faaalia ai ele Pule Sili ole matagaluega ale Palemia ma le Kapeneta le tofa Agafili Shem Leo, e ao foi ia i latou o faauluulu iai auaunaga eseese ale Malo ona fautuaina i latou o faatupeina ni malaga mo fafo ina ia totogi uma ane pasese o ia malaga ile Samoa Airways. Ose fautuaga ma se tuualalo lenei ale Malo ua manino mai ai ose isi lea o taumafaiga e ave ai le lagolago ile toe amatalia ole kamupani vaalele ale atunuu.
E oo mai ile taimi nei e lei faailoaina ele pulega ole Samoa Airways le aofaiga o tupe faavae mo le kamupani vaalele e aofia ai ma le totogi ole lisiina ole vaalele 737-800. Peitai ua faaalia e se molimau e lei faamaonia e faapea e tusa ma le ‘afa miliona tala Amerika le totogi ole lisi ole vaalele ile lua vaiaso. O lona uiga e miliona tala Amerika le totogi ole lisi ile masina. Na fesiligia ele nusipepa ole Sunday Samoan le afioga ile Palemia i sona finagalo e faamanino ai lea tulaga ae na faaalia ele Palemia susuga Tuilaepa L Sailele Malielegaoi, ole fesili ile totogi ole lisi ole vaalele e maua mai ile pulega ole Samoa Airways. Ole fesili foi lenei na tuusa’o ile taitaifono ole komiti faafoe ole kamupani vaalele ina ua taunuu le vaalele 737-800 ini vaiaso e lei mamao atu, peitai sa augata le taitaifono le afioga Feesago Siaosi Fepuleai e faaali sona finagalo.
Na fesiligia foi le Minisita ole Samoa Airways le afioga Lautafi Fio Selafi Purcell, ae na faaalia ole a faailoa ele Palemia le tulaga lea pe a faia le sauniga e faalauiloa aloaia ai le amatalia ole tautua ale Samoa Airways.
Ole saunoaga autu ale alii Palemia i lea sauniga e augapiu ma se vaega na ta’ua ai le totogi ole lisi ole vaalele faapea le aofaiga ose tupe faavae ua amata ai le kamupani vaalele. Sa na’o le saunoaga ale taitai ole malo na faaoioi ai ile atunuu e avatu atoa le lagolago e faimalaga ai ile Samoa Airways.
