Ua toe nei o se aga ona faataunuuina lea o le faamoemoe o nisi o alo o le atunuu e pei ona sauni atu ai i le faaiuga o lenei vaiaso. E toalima alo o le Pasefika ua folifoli atu mo Kalaiesetete e faataunuuina ai a latou fusuaga e pei ona loma nei.
Ae o le aso a taeao o le a faataunuuina ai se koneferenisi i le falekoleni i Kingsland, ma o le a auai atu ai nei alii fusu e toalima faatasi ai ma nisi o alo iloga o Samoa i lea foi taaloga le susuga ia Toaletai David Tua, Maselino Masoe ma Jimmy Peau.
O le autu lava o lenei feiloaiga o le lagolago lava o nei tamalii i le alofaiva atu o tamafanau o Samoa i le fusuaga i le faaiuga o le vaiaso.
E toatolu i latou o le a auai i lea faamoemoe, o le alii o Falani Tavui, o Monty Filimaea o loo koleni e le susuga ia Toaletai David Tua, ma le alii o Vaitele Soi o le a autu i ai le taaloga o le po. O le tāua ia Niu Sila o le Pasefika ona o lea ua mafai ona toe valaau mai ai nei alo o Samoa, ma le tāua o le lagolago i fusuaga ia o le a faia i le Aso Toonai.
Ua tapena nei foi le pulega a le Event Polynesia mo le masii atu i Kaliesetete e tapena ai mo lea faamoemoe, ma ua faailoa mai e lua Fono faufautua a Kalaiesetete ua tapena i lenei fusuaga.
O le vaega o le Fono a Faufautua o loo taitai ai le faautautaga ia Saleutogi (Lemusu) ma le vaega ua ta‘ua o le Fono a Matai o loo taitai ai le tofa ia Lavea Aseta mai le afioaga o Samatau. Faatasi ai ma le lagolago a susuga i faafeagaiga, le susuga i le Sea ia Rev Poasa Leauanae, Rev Solomona Potogi sa avea ma pule o le kolisi i Piula, faifeau toeaina ia o le EFKS ia Rev Tuugama Lilo, faauluuluga o le PIC Rev Makesi Alatimu, Afioga Patele Filoi Alii ma le susuga ia Moega Lasei.
O le faamaopoopoga ma le fesootaiga o nei mea uma o loo taulamua ai le faletua ia Tala Milo, ma o loo manaomia foi e fono faufautua nei se ‘ava o le feiloaiga pe a oo i le aso o lenei faamoemoe, ae ua tuu a lalo i ai le pulega o le Event Polynesia se‘i mae‘a le faamoemoe ona faataunuuina lea o mea uma e pei ona fuafuaina.
