Faasoa atu e talavou mai le Future Skills o latou tomai mo le komiuniti

O tomai nei ua latou aoaoina mai le polokalame tau aoaoga a le Future Skills, na mafai ai e nisi talavou mai Aukilani i Saute, ona faatino sa latou fesoasoani e toe faafoi atu i o latou komiuniti.
O nei fanau aoga a le Future Skills, o loo aoaoina i tomai faakamuta e lē gata i le fausia o meaafale ae o kamuta foi mo galuega tetele. Lea la na a‘e ai so latou faanaunautaiga, o le a faatino se fesoasoani e toe faafoi atu auā se manuia o nai fanau laiti o loo aooga e pei ona manuia ai le Aoga tulagalua a Rowandale i Manurewa, ina ua sauni nei fanau talavou mai le Future Skills, e foai ai ni laulau (BBQ tables) e faaaogā mo meafai a lea aoga tulagalua.
O mataupu o loo aoaoina i le Future Skills, ua mafai ai e nei fanau talavou aemaise lava alo ma fanau o le Pasefika, ona maua nei tomai aogā tele ma o ni tomai foi e moomia mo le sailia o a latou galuega.
I le Future Skills o loo mafai ona aoaoina mataupu mo le maua o le tusipasi (National Certificate) i mataupu e pei o le fausia o fale ma isi fausaga faakamuta (Building, Construction and Allied Trades Skills Level 2 and NCEA Vocational Pathway, Construction and Infrastructure, Level 2).
E iai foi courses a le Future Skill o loo faia i lalo o le polokalame a le malo mo le aotauina o fanau talavou, le Youth Guarantee scheme, lea e mafai ona fai ai ni aoga faavaitainmi ae lē totogia mo talavou e ta‘i 16 ma 17 tausaga le matutua.
Toatele talavou ua latou faafetaia lenei aoga a le Future Skills ona o le tele o tomai eseese e mafai ona aoaoina ai, ma toe maua ai e nei talavou, atonu o nisi o latou sa faavaivai ma faamamulu ese mai aoga na aooga ai, ae o lea ua toe laveai atu e le Future Skills, ma faatamaoaiga ai i ni tomai e mautinoa le maua ai o ni a latou galuega lelei, auā le tausia o i latou ma o latou aiga, i le taimi nei ma le faasolo pea i luma o le soifuaga.
O le susuga i le faiaoga i le matata tau kamuta o meaafale i le Future Skills, le susuga  George Pasene, na ia faapea mai, “O talavou o loo aoaoina i lenei tomai o loo iai moni se faanaunauga e fia faigaluega ina ia fesoasoani i o latou aiga. Pau lava le mea o loo latou moomia, o se isi e taimua ma fesoasoani atu e faasino tonu i latou i le ala sa‘o e tatau ona ui ai. Ma o le taulaiga tonu lena o loo uai atu i ai le Future Skills ma ana polokalame, ia faasino i nei talavou le ala tonu e toe faatulaga lelei ai o latou olaga, aemaise ia iai ma ni tomai lelei e maua ai a latou galuega.”
E lē gata ina aoaoina tomai tau galuega i le Future Skills, ae o loo unaia ai foi le toe faaleleia o mataupu a le fanau talavou, ina ia unaia atili pea a latou aoaoga seia oo atu lava ina ausia isi aoga maualuluga atu e pei o le MIT. Ae pei ona saunoa George, o le mea sili lava o loo taumafai e fesoasoani ai i nei fanau talavou, ia latou maua le lagona o le mautinoa ia i latou lava ma o latou tomai ua maua, le mautinoa e mafai ona toe suia o latou olaga ina ia mafai ona faia nisi mea e sili atu ona lelei, e faaaogā i ai le poto ma tomai ua maua.
E aoaoina foi e fanau talavou le tomai e lototele ai e tulai atu ma maumauai e lagolago se mea ua latou iloa e sa‘o, ma ia uai lelei i mea ua latou aoaoina.
E iai se isi o alii talavou Niue, o Reece Asekona, ua 17 ona tausaga. Na aoga Reece i le kolisi o Aorere ma o le tausaga talu ai, na faailoa ane ai i lenei tama talavou, e lē lava maka ol ana suega e na te ausia ai le Tausaga 13.
O le taimi nei, ua ausia e Reece le tusa ma le 41 credits talu ona aoga i le Future Skills, ma ua silia ma le 95% o lona auai i lana course o loo fai. Ma na ta‘ua e George, o le alii lenei o Reece lea sa sili ona galue mamafa i le faamautinoa ua mae‘a lelei ona fau laulau ia na faameaalofa atu e le aoga mo le Rowandale Primary, ma ia matuā lelei ona tauteuina ma vanisi.
Ina ua faatoa amata mai lenei tama talavou i le Future Skills, o se tama e lē tautala ma e lē fiafia e faifaimea faatasi ma isi. Ae o le taimi nei, ua matuā telē le suiga o Reece, ua iai le uiga mautinoa, ma o ia foi lea o le a auai atu faatasi ma faiaoga i le momoliina o le meaalofa o laulau mo le aoga tulagalua i Manurewa.