“O lau gaioiga ua faatasina ai le tautua a le matagaluega”, Vui Clarence Nelson
Sa galue i le Matagaluega o Faamasinoga ma Mataupu tau Faamasinoga a le Malo o Samoa le tamaitai o Gasegaseivao Alaifea, o ia o se tagata e taliaina tupe e totogi atu i le matagaluega poo se kesia (cashier).
E talavou tele le tamaitai faato‘ā 26 ona tausaga ae ua nofosala i le falepuipui i moliaga e 216 o le faasese o faamaumauga tau tupe, ma le 209 moliaga o le gaoi a o avea ma tagata faigaluega.
O le va o Aperila o le tausaga e 2007 ma Iuni o le 2009 na faatino ai e Gasegaseivao se gaioiga solitulafono o lona tusia lea o le aofaiga sa‘o o le tupe i le lisiti ona ave lea i se tagata, ae o le kopi o le lisiti na te suia ai le aofaiga o le tupe i le faalaititi o le aofaiga o le seleni.
O se faiga na ia faaaogā ai le isi vaega o tupe. E fai si ofo o le faamasinoga i le tuai ona maua e le Matagaluega o Faamasinoga o lea faaletonu pe a fua atu i le taimi na faatino ai e lua tausaga.
O le aofai o se tupe na aafia ai e $22,809 tala. Faaalia e le Faamasino le Afioga Vui Clarence Nelson, o se fafagu mo matagaluega uma a le Malo le tatau ona vave faia ni gaioiga i ni faaletonu tau tupe e aafia ai ina ia vave ona maua, ae lē pei o le Matagaluega o Faamasinoga, a fua i le gaioiga na faia e le tamaitai ua molia e faigofie ona iloa.
O le Matagaluega o Faamasinoga e maualuga tele lona tulaga i le silasila ma le vaai a tagata lautele, peitai ua faatasina i le gaioiga ua faia e Gasegaseivao e pei ona saunoa le alii faamasino.
O le ioeina e le tamaitai o moliaga uma o se lelei lea mo ia, atoa ai ma lona toe totogiina o se vaegatupe e $700 tala.
O se lelei foi mo ia i le vaai a le faamasinoga lona faatoese i le pulega o le matagaluega a o lei iloa e le toatele le faaletonu.
E 5 lima tausaga na amata ai le fua a le faamasinoga mo se faasalaga faafalepuipui ae peitai sa toesea le tasi vae tolu o lea aofaiga ona o itu lelei faasaga i lē ua molia.
Na toesea foi le isi 12 masina ona o le faato‘ā aafia lea i se solitulafono, totoe ai le lua tausaga ma masina e 4 ua tuli ai lona faasalaga i le toese.
Sa talosaga le loia a Gasegaseivao i le faamasinoga ina ia silasila ane o le tamaitai ua lima masina o lona maitaga. Peitai na saunoa le faamasino, e lē mafai ona alofia e le faamasinoga aiaiga o le tulafono e aafia i se solitulafono e aafia ai tupe faitele a le atunuu poo public monies.
