Sa faataunuuina le faamoemoe e le fai faaipoipoga faapitoa sa ia taitaia le sauniga lotu e faapaiaina ai le susuga ia Jeremy & Courtney Siligi, i le malumalu o le Ekalesia Aso Fitu Samoa Tutotasi i le aai o Bell Bird Par.
O le tamaitai faaipoipo o lona tamā o le Maori ae o le Ausetalia lona tina. O le susuga ia Jeremy Siligi o lona tamā o Faleauto Tufi Lauama (Lepā) ma si ona tinā o Vao Siligi mai le alalafaga o Asau i Savaii. Na o ia le alii o le fanau a ona mātua, faatasi ma ona tuafāfine e toalua.
Sa auai le taitai matagaluega o SISDAC, Susuga ia Pr Lagolago & faletua ia Puataunofo Levae, Pr Faamalologa & Tamara Fuesaina, Pr Johnny & Fitulua Siofele, Faafeagaiga ia Foa Fanolua & Merry Vaeluaga, faapea Misa Luao & Emo Matai‘a.
E toatele foi tauaiga sa malaga mai isi Setete faapea isi atunuu ona o le fia auai ma molimauina le aso fiafia o le fanau. O le uncle lava o le alii faaipoipo sa fai ma pule o le tausamaaga, o ia foi sa fai ma fofoga o le po, le susuga ia Tamalelagi Mata Tufuga.
E toatele i latou sa auai e molimauina le faamoemoe, ma o se vaaiga uigaese foi na oo i ai lea aso i le lapopoa o loli sa faafeao ai le ulugalii fou aemaise o la uo sili ma aumea mamae.
Ia manuia le aiga fou. Alofaaga mai lua aiga, uo ma ē masani ae faasilisili mai lua mātua ma mātua o mātua ua lē mafai ona auai nisi e molimauina lo oulua aso fiafia.
