Faasolo pea fetusia‘iga i tuua‘iga o le taufaavalea

Ua alu le vaiaso na tea nei o fai fetaliaiga i luga o ofisa faasalalau ma nusipepa ona o mataupu ua laga mai i le galuega faatino a Leoleo. O se tamaitai na faaalia le faaleaga o lona igoa e ofisa faasalalau ma nusipepa talu ai lapataiga a le Ofisa o Leoleo e vaavaai lelei le atunuu i tagata taufaavalea faapea, aemaise le agai atu i vaitaimi pisi o femalagaaiga i fafo.

O le moliaga o le tau faavalea sa faamauina i lipoti faalevaiaso a le Ofisa o Leoleo, faapea sa avatu se tagi a se aiga i Moamoa e silia i le $3,000 na totogi i lea tamaitai mo pepa malaga ma pasese ae e foliga mai ua tuai ona faatino pepa malaga ma mafua ai le tagi.

E alu le lapataiga i le faaiuga o le vaiaso i leitio, nusipepa faapea ai ma televise ae oo atu le tamaitai i ofisa faasalalau ma avatu le faaseā o le a ave ofisa faasalalau i le tulafono. Na tali tusitala e agai i Leoleo auā o iina na sau ai lapataiga nei.

O le ogatotonu la o le vaiaso lea na sau ai loa ma le tusi ua ave i ofisa faasalalau faatasi ai ma nusipepa ma le Sui Komesina o Leoleo e logo i ai fuafuaga a lea tamaitai e agai i le faamasinoga ona o le faaleaga o lona igoa ma lana pisinisi faaofisa fai pepa malaga.

Ta‘ua e lea tamaitai sa iai le tagi ae na taunuu lava le faiga o visa, taunuu foi le faigamalaga a le aiga lea mai i Moamoa ma na toe faaui i tua le tagi. Na faamaonia mai e le ofisa o leoleo i Faleata lea tulaga ma faamalie mai i lea tamaitai.

O le tali a le Sui Komesina o Leoleo i le isi feiloaiga ma tusitala, e sa‘o le tamaitai ua faaseā o lea na toe ave i tua le tagi, ae sa fai le tagi. O le faafitauli ua galo i le lala o Leoleo i Faleata ona aveese le moliaga lea mai i ana lipoti faalevaiaso.

O lea la na faasa‘o mai e le afioga Misa Nafo‘i Talaimanu Keti lea tulaga ae o le isi vaega o le tusi faitio a lea tamaitai, ona o se isi tamaitai leoleo i le ofisa o leoleo i Faleata.
O le tamaitai leoleo na ta‘ua e le tamaitai ua tuua‘ia le taufaavalea, ua fai faalua le amio o le lafo atu o upu lē migao a o faia le suesuega o lenei mataupu.

O le faitioga lea na tali mai ai foi le Sui Komesina o Leoleo ma faapea mai o le vaega lena o le tusi, ua agai nei leoleo e suesue i lona lotoifale. E mae‘a atu lena faalauiloa ae sau le tusi a le tamaitai leoleo o le a ave ofisa faasalalau i le faamasinoga i le faaleaga o lona foi igoa e aunoa ma se fesiligia o ia ma o le a agai i le tulafono pe a lē faatoese ofisa faasalalau.

O lea foi la ua toe tusi i ai nisi o ofisa faasalalau, alu i le Sui Komesina o Leoleo, le sui sooupu o Leoleo e talanoa i ai i le faalauiloa o lona foi igoa. Ua lē iloa e ofisa faasalalau ma nusipepa poo le ā le mataupu e fia faalauiloa e leoleo e lē sau ai se tusi i lenei vaitau.

Ae o le isi tali na ave i le tamaitai leoleo o le tulafono lava ia a leoleo e sa ona sau se tali i se isi lava o le matagaluega poo ā lava tuua‘iga, seiloga ua sau i le taitai o le Matagaluega poo le sui sooupu.
Ana agai atu foi la tusitala ma ofisa faasalalau e aumai sana tali e pei ona faaali ai lana faagaulemalie e mautinoa lava e lē tautala mai.

Ona pau le isi faamatalaga aogā lea ua maua mai i le tusi a le leoleo, ua faalua ai ii ona molia le taufaavalea ma ua faalua ona toe alu aumai le tupe e totogi ai tagi nei ma sui ai loa tagi ae toe faaui i tua.
O le lē fiafia o le tamaitai leoleo ona o le taufaavalea ua sao faalua ae o le tulafono e tatau lava ona faaauau moliaga faasolitulafono seiloga lava ua faapea mai le faamasinoga e aveese ma o le mafuaaga lava lena na ta‘ua e le leoleo na mafua ai ona aumai pea le ripoti o le taufaavalea i le lisi o moliaga o le vaiaso mai i Faleata auā lipoti a le Ofisa atoa.
Sui Komesina o Leoleo, Misa Nafo’i Talaimanu Keti

Le tamaitai o Goretti Fidow (lona tolu mai le agavale)