E mavae atu ni toa, ae tulai mai nisi toa malolosi ma tino lelei e tauavea le igoa o Samoa i totonu o aulakapi faavaomalo i Niu Sila, seia oo lava ina tini lau o le faamoemoe e pei ona tausinio uma i ai tama taalo lakapi, ia maua se ofu lanu uliuli e taalo ai mo le All Blacks.
O se tala fiafia foi mo alo o Samoa, Steven Luatua ma Francis Saili, na filifili i le vaega fou e toaono ua faaopoopo i le All Blacks, auā ua lē gata ina filifili faatasi mai i le ‘au a le Auckland Blues i le taamilosaga a le Super 15, ae ua fai ma sui o ni alo o Samoa e faaauauina le tulaga lelei ma le talaaga o tamaiti Samoa i totonu o le aulakapi a le All Blacks.
E lē taumate e lei faigata le filifiliga a le faiaoga o le All Blacks Steve Hansen mo alo nei o Samoa ona o le maoae o le faatinoga o le taaloga.
Steven Luatua
O Steven Luatua 22 tausaga, o le taleni taalo lakapi na amata filifili mai ai o ia e fai ma sui o le ‘au a Niu Sila le Under-17 level i le tausaga 2008, faasolo mai lava lea i taaloga a aoga maualuluga i le 2009 seia oo ina toe filifilia foi i le ‘au lakapi a Niu Sila Under-20 i le tausaga 2010.
E ui e manatu nisi, e fou le taalo a Luatua, ona o lea faatoa filifili mo le squad a le Blues i le tausaga na tea nei, peitai e telē lona iloa i taaloga faavaomalo pe a faatusa atu i le taimi na amata filifili mai ai lenei alo o Samoa mo aulakapi a Niu Sila e tauavea le igoa o Niu Sila i atunuu i fafo.
O le tausaga e 2011, na manumalo ai Steven Luatua i le faailoga o le tama taalo lakapi o le tausaga (Junior Sportsman) i tufaga faailoga taualoa mo tagata taaalo a le Samoan Sports Awards.
O le tausaga foi lea 2011, na fai ai ma sui o le ‘au a Niu Sila Under-20 na manumaloina le tournament a le IRB Junior World Championship.
O le faasolo mai o lana taleni na filifilia ai o se loka (Lock/Loose Forward) malosi mo le ‘au a le Auckland Blues i le tausaga 2012 i le taamilosaga o le Super 15 ma filifilia ai nei e taalo i le tulaga o le Loose Forward mo le ‘au a le All Blacks.
Francis Saili
O Francis Saili, e toalua i ai alo fou o Samoa i totonu o le All Blacks, lea na filifili faatasi mai le toaono fou a le ‘au a Niu Sila. O ia foi o le uso laitiiti o Peter Saili, o se Flanker/Numera 8 i le ‘au a le Auckland Blues.
O Francis 22 tausaga na amata mai i le kalapu lakapi a Malisi, na avea ma sui o le aulakapi faavaomalo a Niu Sila Under-20, lea na siamupini mai i le taamilosaga a le IRB Junior World Championship i le tausaga 2011.
O Mati i le tausaga na tea nei, na filifilia ai o ia i le ‘au a le Auckland Blues i le taaloga muamua na taaalo ai ma le ‘au a le Bulls ma e maoae le tele o tulaga e lelei ai lenei alii taalo, e taalo i le tulaga o le Wing, Second Five-Eighths, Centre.
O le filifiliga o le All Blacks lea ua see ai Francis Saili e taalo o se Centre mo le ‘au a Niu Sila.
E siisii pea le lelei o le taaloga i lona tulaga faapolofesa ua iai, e siisii foi le tomai o tamafanau Samoa o loo fai mai i totonu o Niu Sila nei, ma finauina se avanoa e taaalo ai mo le ‘au tele a le All Blacks.
O le faamalo ma le faaeaea ona o taumafaiga a nei alo Samoa, ua lauiloa ai si o tatou atunuu i le lalolagi, aemaise o le galuega fai a mātua e lē taumate le faigata o le tau atinaeina mai o le taleni taalo a le fanau, ae o lea ua faaeaina ma faamanuiaina.
