Ele mafai lava ona noatia lagona i mātua ma ekalesia aemaise o i latou oloo faauluulu iai le taitaiina o autalavou ile taumafai pea lea e faatinoina ni polokalame e fafagu ma faaolaolaina ai le aganuu i totonu o autalavou i aulotu poo ekalesia taitasi.
Ole pine faamau o nei fuafuaga alualu mamao, i totonu o aulotu, ona o lea ua iai nisi o tupulaga talavou ua mafai ona faaaogāina i totonu ole saofaiga a matai pe a oo ina fai le ava ole feiloaiga, o nisi o fanau ua mafai ona tautatala ile lauga, a’o tamaitai ile sulaina o toga ma isi lava galuega e faatatau ile aganuu a Samoa o lea ua mafai ona faaaogāina ai tupulaga talavou.
Oloo tatai le tele o nei polokalame faaleaganuu i nai fanau na soifua ma fananau i atunuu i fafo, oloo taumafai e aoao iai le tautala faasamoa ma le aganuu faasamoa.
Ole tasi lenei o ekalesia oloo pito sili ona toatele tupulaga talavou oloo iai i totonu ole ekalesia Katoliko, ma oloo vaaia ai foi le faatuputupulaia o fanau ma le latou iloa ile faatauaina ole aganuu a Samoa. E mafua mai lea tulaga lelei ona oloo faagasolo pea le tele o ana polokalame oloo faataua ai le aganuu a Samoa aemaise ole faafealofaniga o tupulaga talavou i totonu o aulotu i tausaga taitasi.
Ole Aso Toonai ua mavae 12 o Aokuso na silasila ai le ofisa o Malaeola faapea le nofo a Peresetene o autalavou taitasi amaise o mātua i taumafaiga a tupulaga talavou o aulotu taitasi e faatauaina ai le taua ole aganuu a Samoa e ala i ana siva mauluulu, sasa faapea ma le taualuga.
E 13 autalavou sa auai, o Greylene, Blockhousebay na tuufaatasi ma Henderson, Cloverpark tuufaatasi ma Otahuhu, Leauvaa tuufaatasi ma Otara, Panmure tuufaatasi ma Glen Innes, Mangere East, Mangere Central, Manurewa ma Papatoetoe.
O autalavou oloo tuufaatasi, o autalavou ia sa iai a latou polokalame sa fatinoina ile lua masina ua tuanai ao lea ua taualuga mai a latou polokalame ile tuufaatasiga lenei i Malaeola. Ose mafutaga ua faatupulaia ai le fiafia o tupulaga talavou e galulue faatasi ai auā ole tasi lea anavatau oloo momoli i nei polokalame taitasi ole taumafai lea ia faamasani tupulaga talavou ma ia maua le fealofaniga ma le galulue faatasi.
Ole tausaga ua mavae ma isi tausaga ua tuanai, sa tele ai ina fatauva polokalame a autalavou, a’o le tausaga lenei ua iai le lagona ole laulau e leai se tauvaga e faia, ona se’i vaavai poo lea se suiga e tatau ona oo iai tapenaga a autalavou.
Peitai, ina ua mae’a le polokalame ile tausaga lenei ma ua maitauina ai ele ofisa ole autalavou i Malaeola le suiga tele ua iai le fiafia o fanau e ala ia latou tepnaga ma fuafuaga sa iai.
Ole autalavou a Mangere Central na tatalaina faafiafiaga ole aso ile latou siva ole Mau, ma faasolo atu ai isi autalavou ae taualuga ai ile autalavou mai Greylene.
Ole siva mauluulu, sasa ma le taualuga na faaautu iai polokalame ole aso, e ese mai ai ile ava ole feiloaiga lea sa tatala aloaia ai le faamoemoe sa galulue ai le vaa see lua a Clover Park ma Otahuhu.
Ole fiafiaga sili ile laulau poo le ofisa ole autalavou i Malaeola ole siitia maualuga pea o nei polokalame i tausaga taitasi i totonu o autalavou, ma oloo vaaia ai foi le tele ole suiga ole iloa ole fanau ile faatinoina ole aganuu a Samoa pe a oo ina tauaofia le Malaeola atoa, ae le gata i lea ua mafai ai foi ona toe ofi mai nisi o autalavou e toalua ia Massey ma Greylene e galulue faatasi ma nisi o autalavou. E lei mafai la ona auai mai le autalavou a Massey i lenei faatasiga ona sa iai a latou tuatuagia.
Ofisa Autalavou Aoao
Peresitene – Muliagatele Tausoo Tanoai (Panmure)
Sui Peresitene – Musuiaiga Neil Tapu (Otara)
Failautusi – Agnes Seiuli (Leauvaa)
Teutupe – Porlin Pua (Henderson)
