Ua faalauiloa mai nei le vave faamavae aloaia a le kapeteni muamua o le Toa Samoa le susuga ia David Faalogo mai le NRL faapea le taaloga o le Liki. O lenei tala i le malolo litaea mai o Faalogo i le taaloga ua afu ai lana tautua ua mafua mai i se manu‘aga o loo i lona ua (neck injury) o loo tauave pea i taimi o taaloga.
O se tagata taalo malosi aemaise le tulaga e tamoe ai i le laina i luma. O loo manatua pea lenei alo o le atunuu i lana saunoaga i taimi o fono a tusitala ma tama taaalo i le taamilosaga o Atunuu e Fa pito i luga o le lalolagi (Four Nations) lea sa ia tali i fesili a tusitala o Samoa e taalo mo le tapuaiga a le atunuu ae lē o le tupe e taui ai le tautua i le Toa Samoa.
Sa faamalamalama foi e David Faalogo le pito i luga o le mafutaga faaleuso i totonu o le ‘au faapea ma le tapuaiga nai lo le tamaoaiga. Na faamanino ma faapupula lea mau i le lalolagi i le mataina o le taalo ma le fatu o le Toa Samoa i lea tauvaga na kapeteni ai Faalogo na semanu e malolo ai Egelani ma Niu Sila i se taumafaiga maoae. E malolo litaea nei le alo o Samoa o loo taalo pea mo le Newcastle Knights. E sefululua (12) tausaga o taalo lakapi liki,198 taaloga ua taalo ai mo le NRL a o lei see atu mo le Supa liki i Peretania lea e atoa le 57 o ana taaloga i lea tauvaga.
Sa avea muamua foi Faalogo ma kapeteni o le aufili liki a Niu Sila ma e 12 taaloga na tauaveina ai lea tofiga mo le Kiwis. Na faalua foi ona taalo mo le aufili a le Exiles i Egelani.
Ae peitai na faailoa e David Faalogo i le 2014 o le tofia o ia e kapeteni le Toa Samoa o se faalogona e lē galo talu ai le faamoemoega o le tapuaiga a Samoa na tuuina atu mo le ‘au atoa.
E valu taaloga na taalo ai mo le Toa Samoa ae faalima (5) taaloga na tofia ai e kapeteni. O taaloga ma Egelani faapea Niu Sila i le 2014 o loo avea pea ma taaloga faagalogata i le tapuaiga i le maoae o le sao o David Faalogo na taitai ai nei taua matautia a le Toa Samoa.
Ua faapea foi ona momoli aloaia le faamalo ma faamanuiaga a le Toa Samoa mo Faalogo ma lona aiga i le lumanai.
