O le Living Streets Aotearoa, o se faalapotopotoga i Niu Sila ua faapitoa mo tagata o loo savavali ma faalauiloa i le komiuniti le savali ma faauo i isi tagata. O se faalapotopotoga faavaomalo faapitonuu o loo mafai ona faatasi i le lotoifale ma paaga o Niu Sila atoa. O le Living Streets Aotearoa o loo latou lagolagoina malosi le Golden Foot Walking Awards o loo faamanatu ma iloa ai Niu Sila i le ausia lea e tagata savavali i le latou faailoaina lea o nofoaga fou, e faailoa ai faiga fou masani a le atunuu ma tauia le faaauau pea ona faia o le savali.
O le sauniga o le tufaga faailoga na auai atu ai le Minisita o Felauaiga ia Julie Ann Genter. O se sauniga ua siitia maualuga ai foi le tulaga o le fatofala’iga a le Walking Samoans i totonu o Niu Sila e pei ona auai atu iai le ausavavali e tasi mai Ueligitone i Porirua, o i latou foi ua fai ma sui o ausavavali e sefuluvalu i Aukilani ma le tasi mai Palmerston North i lea faamoemoe.
O se agaga maualalo na talia ai e le susuga ia Siaosi Anamani o le taitai o le Walking Samoans i Porirua ma le latou ausavavali lenei faaeaea ua tuuina mai e le Living Streets Aotearoa mo le ausavali i Porirua.
O le susuga ia Eteuati Ete na ia tauaaoina le faailoga mo le Walking Samoans. O le auai atu foi o latou i lea polokalame ua avea o se fataitaiga tele lea i savali i Niu Sila ma faamalosia ai tagata e molimauina ma faasalalauina le manumalo o le Walking Samoans i lenei tufaga faailoga.
O le agaga fiafia ma le loto faafetai o le susuga i le taitai ia Siaosi Anamani ia latou taitoalua ma aiga ona o le lagolago malosi atu i le faatuina o le latou kalapu. O lona agaga faafetai foi i le Atua ona o lenei faatofala’iga ua siitia maualuga ai le igoa o Samoa i totonu o Niu Sila, ae o le talalelei foi lea o loo mafai ona faasoa ma fesoasoani ai i tagata, nuu ma ekalesia i le faatāuaina o le soifua maloloina lelei o tagata, aemaise o se siosiomaga saogalemu ma le faauo i vaiaso o loo faia ai le savali. O le taimi muamua lea ua maua ai se faailoga a le Walking Samoans i lenei polokalame, ma o se faaeaea tele lea mo le komiuniti a Samoa ma le Pasefika.
