Mai lava i le latiiti o le tamā ia Moe Keniseli Felagai, sa maua ai i se gasegase o le sela, o lea ma’i sa avea o se gasegase tumau i lona soifuaga atoa.
Ua alu faatasi lea ma’i faatasi ai ma le mapuna o lona tua, i galuega sa galue ai i Samoa a’o lei malaga mai i Niu Sila. Ua malaga mai i nei atunuu, ua faatumauina pea ia ma’i e lua i lona tino, ma ua tauau ai ina fiu e saili se togafitiga, ae ua suia ai foi ma lona malosi.
Ua faasolosolo le matua o lona soifua ma ua atili ai ona faatupulaia foi lea ma’i ia te ia, ae ua ia faalogoina ai ma isi mea ua tiga faasolo atoa i lona tino, e pei o le tiga o soona o ponaivi, o lona tuaua e le mafai ona mimilo e faasaga i se itu, e le mafai ona punou i lalo e fai se galuega. Ua ta’utino le tamā ua leva tele ona ia tauaveina nei ma’i, o lona sela a oo ina oso, e oso ai ma lona tale. Ma o se avega mamafa ia te ia le faalogoina o mea e tiga solo mai i lona tino aemaise lava pe a oo mai le tau malulu.
O lona toalua le tina ia Talalelei Moe e gasegase foi i lona itu agavale, ua silia i le 40 tausaga o ia tauaveina foi le tiga o lona itu. Ua fiu e o i fofo, ma o i fomai e fai faata e le taitai ona tea ai le tiga. A oo ina oso le tiga e toetoe a puni ai ma le manava. O le talitonuga o Talalelei o lona itu ua tauau ina faalogo atu ua tau le mafai ona faagaioi i nisi o taimi. Ua iai taimi ua manatu ai o ia ua stroke, auā e iai foi taimi e oso ai le tiga, e leatapaia uma ai ma lona tino ma lona ulu. E iai taimi e faafesoaa’i ai ma le tamā ia Keniseli i nei mafatiaga o le tino.
Peitai na laua faalogoina i luga o le leitio se tasi o tamalii o le atunuu, o loo iai le meaalofa a le Atua i le fofoina o soo se gasegase aemaise lava i tagata matutua na mafua ai loa ona tulai ma o saili lea fesoasoani mo laua. I
le saunoaga a Keniseli, na faalogo i le fofo ae lei iai sona mafaufau e alu e fofo ai. Pau le mea, o le tina ia Talalelei lea ua vigaviga atu ia te ia e o e ave ia e vaai le fofo atonu e manuia ai lona ma’i.
O le ta o le 3 i le vaveao o le Aso Faraile na usupo ai loa e saili le nofoaga sa fai ai le fofo, ona o le naunau lava ia maua se fesoasoani mo le tina. Peitai ane ua avea le fofoina o le tina ia Talalelei ma avanoa na faasoa ai le tina i le fomai i gasegase o loo taotaomia ai le malosi ma le galue o le tamā i totonu o le laua aiga.
Na maua le taimi e togafiti ai e le fomai le tamā ia Keniseli, ma o le fofo muamua na lagona ai e le tamā le suiga atoa o lona malosi ua maua. Ua le mafai le pulunaunau atu auā o lea ua maua le laveai, mai gasegase sa tauaveina i le tele o tausaga. O le fofo lona tolu ma faasolo atu ai i le fofo mulimuli e fa ai fofo, o iina na faalogoina ai e le tamā ma le tina le suiga atoatoa o le malosi ua oo mai.
I le saunoaga a le tamā ia Moe Keniseli, o ia e lei alu e fofo, na’o le tina na o e ave i le fomai, ae peitai ane e ese foi auala a le Atua mo ia ma ona mafatiaga. Talu ona mae’a ona fofo ia, e oo mai i le taimi nei, e le o toe faalogoina se mea o tiga i le sooga o ona ponaivi, o lona tua tiga sa mapuna, o lona ua foi ua mafai ona femilosa’i, ma o lea foi ua mafai ona punou i lalo e fai ana feau. O lona sela ua telē le suiga o le ma’i lea mo ia, ua seasea oso le sela ma oso lona tale.
Ae o le molimau a le tina ia Talalelei Moe, ua matala noanoataga o lona itu agavale ina ua maua le togafitiga, ua le o toe faalogoina se tiga ma ua faatuputeleina foi lona malosi e oo foi i le tamā o le aiga.
O le Aso Sa, 15 o Iulai e atoa iai le 80 tausaga o le soifua o le tamā ia Moe Keniseli ma o le laua lea agaga faafetai i le Atua ona o le saunia o lea tamalii ua maua ai se fesoasoani mo laua e ala i gasegase sa maua, ma ua mafai ona toe maua ai le malosi lea o le a malaga ai i Ausetalia e faamanatu lona 80 tausa
