“Auā o Ieova Na te foai mai le poto; mai Lona fofoga le poto ma le faautauta”. E lē faigofie ae faaeaina i le agaga meemee ma maualuga ai pea le viiga o le Atua.
O le aso 29 Setema i le Aotea Centre na faataunuuina ai le faauuga a Taito Eddie i ana faailoga e lua o le Post Graduate Degree i le Political Studies ma lana Master of Public Policy, mai i le Iunivesite o Aukilani.
O lea faamoemoe matagofie sa molimauina e aiga, o uo ma ē masani aemaise ai si ona tuaa, le tina matua ia Lepanona Telesāmalanuola Tuiletufuga.
O le tina matua ia Lepanona sa ia faia le faiva o le tapuai ma le tulivae a o feagai ai Taito Eddie ma ana aoaoga, ma o se fiafiaga tele mo Lepanona le faaiuina ma le manuia o le taumafaiga a lona alo.
E silia ma le fāselau alii ma tamaitai faauu na maua isi faailoga Masters, ae peitai na o Taito Eddie Tuiavii le tagata Polenisia na ia tauaaoina le Master of Public Policy, ia viia ai le Atua i le tomai ma le poto ua ia foai i alo ma fanau aemaise o alo o Samoa i le sogasoga e finau auā se manuia o aiga, nuu, ekalesia ma le atunuu.
O ona tuaa le tamā ia Eddie Tuiavii o Sataoa ma Salailua, faapea le tina ia Taulagia Tuiavii Tuiletufuga mai Apia ma Faleasiu.
