O le vaiaso lenei o loo faagasolo ai le Sulu o le Filemu, o le faamanatu ai o le 16 o Aso o faalauiloa o le taofiga o sauaga faasaga i tamaitai. I Samoa ua tele polokalame ua faagasolo ai amata mai lava i le vaiaso na tea nei seia oo mai i lona vaiaso mulimuli lenei.
O loo matuā tele faalauiloa e ala i faatalatalanoaga ma tina ua sauaina i le tele o tausaga ma ua manino ai foi i polokalame e pei ona galulue faatasi ai Leoleo, Matagaluega o Tina ma Tamaitai, PPSEAWA le sosaiete o tina o le Pasefika ma Asia i Saute i Sasa‘e faapea Tamā o loo tutufaatasi e tetee atu i nei sauaga, le tele o nei faafitauli ua amata mai lava i totonu o aiga. O le tele lava o tamaitai e sauaina e nisi o loo fesootai vavalalata iai.
O le Toomaga mo e Puapuagatia le isi faalapotopotoga ua malosi ana faalauiloa e pei ona faatautaia ai le Sulu lenei o le Filemu lea ua soo Upolu ae ua aga‘i atu nei i le motu tele i Salafai ma ua faafetaia e le Toomaga le tali mai a le atunuu e ala i le fia iloa atili o auala e uia e tamaitai pe afai o loo nonofo pea i ulugalii o loo sauaina ai lava i aso uma.
E le gata i lea o fesoasoani o loo maua e taumafai ai faatalatalanoa nei mataupu ma tau saili suiga ia i latou o loo faia lea faalēalofa i aso taitasi.
O le faamoemoe o le aga‘i atu o le sulu i Savaii ina ia oo atu i ai le fe‘au o le filemu i le mamalu o tagata o loo alala ma papaaao i lea tafa o Samoa le fe‘au o le tetee atu ma taumafai e taofia le sauaina o tina ma tamaitai ae le gata i lea o le fanauiti.
O le susuga ia Autagavaia SakariaTuioti lea na taitaia atu le faigamalaga lea i le Motu Tele i Salafai mo lea faamoemoe lea na moe i le afioaga o Salelologa ma faatamoe atu ai loa e tau i le Itumalo o Palauli le Falefa ma Palauli i Sisifo ma moe ai i le afioaga o Gataivai i le faaiuga o le vaiaso.
O le faamoemoe lava ina ia faasopolia uma afioaga taitasi o le motu tele i Salafai a o lei toe taliu mai le sulu mo le faamae‘aina o lenei polokalame i le aso sefulu o lenei masina ua savalia.
O loo faaauau foi i le vaiaso lenei le polokalame ua ofo fua ai aoga o le tali atu i osofaiga (self defense) i le faletaalo o le Iunivesite Aoao o Samoa i Lepapaigalagala. O loo faatautaia e le PPSEAWA ma Seti Atimalala nei aoga ma e leai se totogi.
O le isi polokalame o loo faagasolo i lenei vaiaso o aoaoga ia ma feiloaiga ua faia e Tama e tetee atu i Sauaga faasaga i Tamaitai ma o loo galulue ai le Matagaluega o Tina ma Tamaitai, Atina‘e o Nuu ma Aga Fesootai i le faatautaiga o nei aoaoga ina ia iai se auala e mafai ona fesoasoani ai i tamā o le atunuu e taofiofi ai le ita.
O le aso lona lua sa faatamoe atu ai le sulu mai le afioaga o Falefa seia pā‘ia le mata Aleipata ma moe ai i le afioaga o Matatufu i le Maota o le faafeagaiga EFKS. O le aso lona tolu lea na alu ese mai ai le sulu mai Matatufu ma agai mai ai i le atu Falealili ma Safata seia pā‘ia mai Lotofaga i le afioaga o Matafaa lea na moe ai i lona po lona tolu ma le po lona fa lea na ave’esea mai ai le sulu i Matafaa ma agai mai ai loa ia Falelatai atoa seia pā‘ia Manono-tai lea na faataamilo ai le sulu i Upolu.
