(60 tausaga o le tamā ia Pouniu Asiata Evile ma lona tausi ia Alosia Tuala Petelo ma le 35 tausaga o le la osiga feagaiga i le faaipoipoga)
Na tumutumu le hall a le kalapu lakapi a Otahuhu i le afiafi o le Aso Faraile, aso 1 o Aukuso i uo ma ē masani faapea aiga na lua na agai atu ma molimau le atoaga o le ta‘i 60 tausaga o le tofa ia Pouniu Asiata Evile Lavea ma lona tausi ia Alosia Tuala Petelo, faatasi ai ma le faamanatuina o le 35 tausaga talu ona feofoofotai le alofa i le sakarameta o le faaipoipoga.
O se afiafi lagilelei ma sa vaaia ai foi le laufofoga fiafia o nai tamā ma tina matutua o uo a lenei ulugalii. Na auai atu ai le faletua o le sui peresetene o le Pulega o le ekalesia Katoliko i Malaeola ia Sia Maiava faapea le teuoloa o le pulega le susuga ia Tamala.
Sa mafai ona faatasi atu i ai le afioga ia Tuaopepe o le taitai o le polokalame o le Aoao malu manogi o le lolo ma lona faletua ia Tolu. Na iai foi nisi o le aiga o le tina na malaga mai i Samoa auā lava le faailogaina o la aso soifua.
Na amata le faamoemoe i le ‘ava o le feiloaiga e pei ona masani ai tu ma le aganuu a Samoa, ona sosoo lea ma le sauniga na taitaia e le susuga i le failautusi aoao o le ekalesia i Malaeola ia Taupau Mulipola ma o ia foi o le peresetene o le ekalesia i Otahuhu.
O le tofa ia Tevaga Paulo sa fai ma sui o aiga na lua e faafeiloaia le paia o le auvalaaulia, a o le fofoga o le po o le susuga ia Fulu Pouniu Mase Tuala e malaga mai i Ausetalia. Na tatala le pa mo le vai taumafa a le atunuu, faatasi ai ma le fa‘ili mālie a le susuga ia Lu Falealo Felise. Sa iai foi aitema a le fanau na faatinoina i lea afiafi ona o se latou meaalofa lea mo i laua i lo laua aso fiafia. Na saunia foi e le fanau keke e lua mo la aso soifua ma le faamanatuina o le 35 tausaga o le la mafutaga.
O le susuga i le teutupe ia Tamala sa fai ma sui o le Pulega i Malaeola e molimolia se meaalofa mo i laua. Na lē toe iai se mea e gase pe vevesi vale ina ua feoai teine o le Talimanao e tufa le taumafataga i luga o laulau, e taualuga ai le faamoemoe. Na faaiu le mafutaga i upu taumavae ma faaaloaloga e pei ona masani ai.
O le tofa ia Faamoe Tauloa Uilisone sa fai ma tootoo o aiga na lua e molimolia le faafetai i le mamalu o le auvalaaulia na molimauina le faamoemoe, ao le tofa ia Silia Laei sa lauga e tali faitau i le paia o le aiga.
O le tofa ia Pouniu Asiata Evile Lavea e mai le afioga o Satupaitea, Safotu ma Matautu, a o le tina ia Alosia Tuala e mai le alalafaga o Leauvaa, Samatau ma Palauli, ma e toafitu o laua alo.
