Ausiva na faafiafia - Photo: Tausaga Fagaio

Ausiva na faafiafia – Photo: Tausaga Fagaio

E ui ile tetele ole malulu i Melepone ile taeao o le Aso Gafua 11 Iuni 2018, ae lei faafiti ai le mamalu o Samoa o loo alala ma papaaao i lea foi vaega o Ausetalia, ile lolofi atu lea, ile faailogaina o le Tutoatasi o Samoa i le Community i Melton.

O le sisigafu’a lenei sa tapenaina e le Fono Faufautua a Samoa Tafesilafai poo le Victoria Samoa Advisory Council Incorported (VICSAC).  O le faamoemoe sa lagolago malosi iai le Melton City Council, ose vaega o le latou faiga paaga ma le Fono Faufautua Ta Fesilafai.

Na amata ile sauniga lotu na taitaia lea ele susuga ile faafeagaiga ia Rev Samuelu Tuumaai, mai ile Ekalesia Metotisi a Werribee, ma o i latou foi na lagiina viiga uma o lea faamoemoe. E le aveesea lava lagona o le meemee pe a potopoto Samoa e faamanatu lona Malo Tutoatasi, e maligi i le loto loimata o le fiafia ma le mitamita, e ui ona o tatou aumau i atunuu ese, ae pele pea Samoa ile loto ma o tatou faasiulaumata i lo tatou faasinomaga ma lo tatou tupuaga.

O lagona foi ia o Samoa na potopoto ilea aso, a’o faagasolo sauniaga mamalu o le faamanatuina o le Tutoatasi o Samoa i totonu o le aai tele o Melepone.

Photo: Tausaga Fagaio

Photo: Tausaga Fagaio

Na maua le avanoa e fesootai atu ai ile afioga ia Pulotu Canada McCarthy lea na ia taua ai e faapea, o le fono lenei na faavaeina ilea so 31 Mati 2018, ma a’e ai se tofa ia i latou na amataina, e tatau lava ona fai se isi fono faufautua, e ui e iai foi le isi Fono Faufautua ua leva ona iai, peitai, e iai lava le manaoga mo se isi Fono Faufautua i lenei pitonuu aua tagata Samoa o loo papa aao ma alaaala ai.

Na ta’ua foi e Pulotu, e mamao tele le va o pitonuu nei e lua o loo iai le isi Fono Faufautua, ma le pitonuu o loo iai nei le Fono Faufautua lea ua faaigoaina o le Fono Faufautua Tafesilafai, ma e faigata ai ona feoai tagata Samoa mai lea itu ma le isi itu. E le gata i lea na ia ta’ua foi, pe a faatusa ia Sydney i Ausetalia lava, e tusa ma le fa (4) fono o loo iai, e faapena foi Brisbane latou.  O le faatinoga o le latou polokalame, na matagofie ma ola, ona o le tele o faafiafiaga faapea foi le toatele o susuga i faafeagaiga, na auai mai Ekalesia eseese.

Na le ofi le nofoaga na fai ai lea faamoemoe, ona ele gata o se aso malolo iinei na faamanatu ai, ae ona ole pitonuu lava lenei o Melton e toatele tagata Samoa o loo nonofo ma aumau ai.  Na maea nisi o faafiafiaga ona alo foi lea ile taliga sua, ma siva samoa lea foi na maua le avanoa e fai ai se siva samoa a le vasega o faifeau uma e faailoa ai lo latou lagolagoina o  fuafuaga a le latou fono faufautua.

O le laulau a le fono lenei o le taitai fono o le susuga ia Fue Feala Seinafolava, Sui Taitaifono, Afioga ia Papalii Toesulusulu Sua, Teutupe Samoauatasi Sega, Failautusi ole faletua ia Maryana Patelesio Fitiao.

Faamatalaga na tuuina mai.

Sui o le Fono Faufautua - Photo: Tausaga Fagaio

Sui o le Fono Faufautua – Photo: Tausaga Fagaio