Ua amata ona luluti le malulu o Niu Sila ae taulimaina loa e Tamaki Walking Samoans o latou ofu mafanafana mo le savali mai le pulega a lo latou nu’u, le Maungakiekie-Tamaki Local Board.
O le tala a le Tusi a tuitui e tatala mai, a saili e maua. O le vaega tolu lenei o fa’amanuiaga ua maua e le Tamaki Walking Samoans.
Muamua o le avanoa e fa’aaoga ai le Panmure Community Centre i Aso Tofi taitasi e leai se totogi.
Ona sosoo ai lea ma le taulimaina o seevae savali fou mo le ausavali atoa a Tamaki i le tausaga ua tea. I le feiloaiga ma le taitaifono fou o le Maungakiekie-Tamaki Local Board, susuga ia Chris Makoare, fa’apea Nerissa Henry, sa fa’afetaia ai foi e le Tamaki Walking Samoans le taitaifono sa iai ia Josephine Bartley.
O le tamaitai Samoa ia Josephine ua avea nei ma councillor o le aai tele o Aukilani. Peitai e le fa’agaloina lona tulai mai a o avea ma taitaifono o le Local Board e lagolago le talosaga a le Tamaki Walking Samoans.
Sa fa’apea foi ona fa’afetaia alii Fa’atonu ia Teleiai Edwin Puni ma So’oalo Setu Mua sa auala ai fesootaiga. E le gata i lea a o le ofisa o le Health Star Pacific i Panmure sa avea ma fa’amalu e talosagaina ai lenei ala manuia.
Ua le gata ia Tamaki Walking Samoans, ae ua fa’apea foi ona maua e Otara Walking Samoans, Whau Walking Samoans fa’apea Clendon Walking Samoans nisi o ala manuia. Fa’alia e le fetalaiga ia Teleiai, “O le Aso Faraile na te’a nei sa fa’apea ona faia ai le aoaoga mo kalapu uma Walking Samoans i Ala Manuia e atinae ai a latou polokalame.”
O le masina lenei o Iuni ua savalia ai loa e Fa’atonu ia kalapu taitasi e fa’amalamalama ma lagolago i le tapenaina o a latou fuafuaga mo Ala Manuia e aofia ai talosaga i Local Board. Fa’alia e So’oalo, “O le tapenaga ua fa’asavali nei ina ia le fa’apito manu ia Tasi i lalo o taiala a le Walking Samoans.”
O le mea moni e le o toe fa’atafa le Walking Samoans i le fa’aogaina lelei o le Susu ma le Meli o lea lava e tafe i Aotearoa.
Faamatalaga na tuuina
