Ua i ou luga le Agaga o le Alii, auā ua na faauu ia te oe e folafola le tala lelei i ē matitiva, ua auina mai oe e ia e faamalolo i e loto momomo, e talai le saolotoga i le tafeaga, ma ia pupula mata o ē tauaso, e tuu saoloto i ē ua faasauaina.
O le valaauina lea o lau susuga a le tamā faifeau, ae o o matou agaga e vivii atu i le Alii mo le Iupeli Auro ua faamanatuina faatasi ma lau susuga, aemaise o le susuga i le taitai aoao o Niu Sila, Samoa ma Ausetalia le susuga i le faafeagaiga ia Kuki Aloalii ma le faletua ia Lupe. Faafetai mo galuega faatino o lo lua valaauina ma le faletua, o maloloina ai soifua faaleagaga o le Ekalesia, ma tatupu ai mo le malosi ma le agai i luma o le galuega.
Alofagia e le Atua lou soifua manuia foai nisi tausaga se tele, aemaise o lana faamalologa ma lana faauuga ia tumau i luga o lau susuga. Manuia lou Aso Soifua Pastor!
Alofaaga o lau Ekalesia atoa i Melepone, uo ma aiga, aemaise o le faletua ia Lupe ma nai o lua alo.
