O le ā lava le valaauina ma tofiga o sailimalo ai le paia lasilasi o nai o tatou tagata i atunuu i fafo, e iai lava taimi e toe tomanatu ai ma manatua si a tatou Samoa faapelepele aemaise o a tatou agaifanua ma tu masani o le soifuaga. O le vaiaso na tuanai atu na faatāuaina ai e le laumua o le faalapotopotoga a le Youth with a Mission (YWAM) i le aai o Melepone tu ma aganuu faa-Samoa.
O le susuga i le faafeagaiga ia Andy Mcfarland ma le faletua ia Epenesa o nisi ia o taitai o le faalapotopotoga, o laua ia na taiulu i tapenaga ma le faataunuuina o le vaiaso faatasi ma le lagolagosua a nisi o alo ma fanau ma tamalii o le atunuu o loo a‘otauina ma galulue i le laumua.
Na saunoa Andy na amata le faamoemoe i la latou ava o le feiloaiga i le Aso Gafua ma nisi o taitai o le YWAM mai isi setete, sosoo ai ma a latou faafiafiaga faa-Samoa, ae o le Aso Lulu na faatinoina ai le gaseseina o taumafa i tulaga masani pei o le suavai a taulelea ma kuka masani a tina ma tamaitai, mo le taligasua faapitoa i le afiafi (special dinner) ma a latou malo faaaloalogia faapea nisi o le mamalu o le aufaigaluega paia aemaise o tupu ma tamalii o le atunuu mai ekalesia eseese i Melepone, faatasi ma taitai o atumotu eseese o le Vasa Pasefika.
Na maeu le matagofie o le taumafataga aemaise o faafiafiaga faa-Samoa, a o le mataalia foi o le au tautua e pei ona faatino lava i le aganuu e masani ai. O le Aso Faraile na faataunuuina ai nisi o faaaloaloga masani pei o le ta‘iina o sua ma ona teuga eseese, mo nisi o malo faaaloalogia ina o le a toe taliu i setete na malaga mai ai, a o le po o le aso lea, na valaaulia ai nisi o autalavou a ekalesia Samoa ma faafiafia faatasi ai ma le Island Breeze i la latou polokalame faapitoa mo tupulaga talavou (Youth Rally), lea na matuāa faatumuina ai le hall tele a le laumua.
O nisi o a latou polokalame sa faataunuuina, o le aoaoina lea ma faailoa i le lautele o le laumua le tala faasolopito o le talalelei i lona taunuu atu i Samoa ma lona taliaina ma amataina ai ekalesia eseese o i ai nei, e pei ona faapine ma faatāuaina e nai o tatou tuaa ma faamau ai taeao iloga o lo tatou atunuu.
Ua sosoo nei la latou vaiaso o tu ma aga i fanua, ma la latou koneferenisi tele o malo uma o le lalolagi o loo usuia i le aai lava o Melepone i le vaiaso atoa lenei. Tau ina ia sagai ane ai o le tai ma saga faamanuia le Atua silisiliese i fuafuaga fai a le laumua.
