O le patipatia ai o le tausiga ma le alofa o le Atua i le atoaga o le 21 tausaga o le tamaitai o Avei Iasinta Vilifiti Asiata na tumutumu ai le hall a le Ekalsia PIC i Magele i le Aso Toonai ua mavae i ona aiga uma i totonu o Aukilani nei aemaise o ana uo ma paaga, ae lē gata i lea o lana aufaigaluega, o lona grandma mai Samoa o Avei Vilifiti Asiata faapea aiganalua.
Sa faatasi atu ai foi susuga i faafeagaiga o le Ekalesia PIC ia Rev Maua Sola ma Rev Vaiola Ropati faapea Rev Misa Tanumoa Teleiai mai le ekalesia Kanana Fou i Magele.
Ma o se avanoa ua mafai ona toe maua ai se feiloaiga ma mafuta ai aiga uma auā e seāseā maua se laolao faapenei e feiloai ai. Ae o le viiga ma le faafetai i le Atua ua lē gata i le faamanatuina ai o le 21 tausaga o Avei Iasinta Vilifiti ae ua mafai ai foi ona toe talanoa ma aai faatasi aiganalua, o uo ma ē masani.
E tomua lava i le viiga ma le faafetai i le Atua e pei ona masani ai faamoemoe faapenei, lea sa tulai ai Rev Maua Sola auā le taitaiina o le sauniga ma se upu faalaeiau mo le tamaitai fai aso fanau aemaise ai le auvalaaulia na molimauina lea aso tāua.
E felanulanuai molimau o le aso ma o se luitau tele ma se oso lelei o Avei Vilifiti Asiata i lana savaliga faatamaitai talavou e pei ona iai lona olaga tuputupu a‘e.
Na sosoo ma le faapaiaina o le keke ma le foaiina o le ki e ona tuaa ia Lautafi Vilifiti Asiata ma Soli Tupesina Vilifiti Asiata. E lē tuua lava le molimau a mātua i le mafutaga ma fanau auā o le tasi lea pitolaau e fia faafofoga i ai le avalaaulia, ae na taliga e fia logo le mauga o Salafai i le au faafofoga i le talatala o le tamā ia Lautafi i le latou mafutaga ma si ona alo, na ia saunoa ai o se tamaitai e loto maualalo, e agamalu ma e usitai tele i ona mātua, o le ata ma le faataitaiga lelei foi lea o loo ia faatinoina i tupulaga talavou i totonu o le ekalesia PIC e pei ona galue ai, molimau foi lona uso laitiiti i le faapalepale o lona uso matua i le la mafutaga.
Na solosolo lelei le faagasoloina o le malaga o le vaa i Salafai i le faatauaiga a le fofoga o le aso le alii o Keka Vilifiti o le atalii matua o Lautafi, ae sa vaavaalua ma le tamaitai ia Rosesalie Ulugia Stanley. Na taunuu le malaga i le uafu i Salelologa ma faia ai loa le taumafataga i kuka felanulanuai a le fale‘aiga o le Continental mai Otahuhu ae faafiafia ai le faili o le Kanana Fou a o fai le taligasua.
E fou ma mālie i le aufaafofoga sikaili a le MC, o le vaa e alu i Savaii i le motu o loo sau ai lona tamā e lē toe foi mai i Apia. Toatele foi nisi sa tapenaina ni meaalofa mo le tamaitai ia Avei auā lava lona aso fanau, o lona aunty ia Siiva Schuster na saunia le keke, a o lona grandma ia Pili Faletaua na tapenaina le Ki, faatasi ai ma ona laei sa saunia e lona tauusoga ia Liana Mamapu.
O le mae‘a ai o faafiafiaga ma le taligasua na faaiu ai loa i faaaloaloga. O le tofa ia Lautafi Vilifiti Asiata na fai ma sui o aiganalua e tu tootoo auā le faaaloalo mo le mamalu o le auvalaaulia aemaise o le aufaigaluega totofi a le Atua, ae o le tofa ia Lavea Leitu sa fai ma fofoga o le ekalesia ma le auvalaaulia e tali faitau i le tootoo o le aso.
O Avei e lona lua o le fanau e toafā a le tamā ia Lautafi Vilifiti Asiata ma le tina ia Soli Tupesina Vilifiti Asiata, ma o loo galue nei Avei i le kamupani o le Cardinal Logistic e fesoasoani ai i lona aiga.
