I le sauni atu ai o le mamalu o Sini e faamanatu le Tutoatasi o le 2015 lea e faia i le Whitlam Centre i Liverpool, na fesiligia ai se taofi o le alo o Samoa iloga i Iunivesite Oxford, Michigan ma Aukilani lea na malaga mai Sini mo aso e tolu e saunoa i se faatasiga a tagata atamamai i talaaaga o le lalolagi na faia i le Iunivesite o Sini.
Sa fesiligia le Alii Polofesa ia Toeolesulusulu Damon Salesa i sona taofi i le tatau na faatāuaina ma sapai pea e tupulaga talavou Samoa i Sini nei lo tatou faasinomaga ma agaifanua e faapei o isi tagatānuu.
Na saunoa Prof. Salesa, “I lenei vaitau mo tupulaga, e tatau lava na iai se poutu o latou soifuaga e mausali ai olaga tuputupu ane i totonu o aiga, aoaoga ma le lumanai.”
O le soifuaga faasamoa o se tasi lea o potu aoga aupito mataina ma aogā e lima taitaiina ai fanau mai le laiti seia oo ina matutua. I totonu o afioaga ma nuu o le peaiga mai le tamaitiiti ma le teineitiiti seia oo atu i le aumaga ma le aualuma, o vasega eseese nei e tapue ai tautua eseese ma tomai e sauni atu ai mo le lumanai.
Saunoa le Alii Polofesa ia Toeolesulusulu, “O la tatou aganuu ma le faasinomaga ua maioio ma tuumatamaga, ma o se aoaoga sili lea e faatonutonu ai amio, uiga ma le manatu pulea ma le va nonofo ai aemaise lava i le faaaloalo ma le faapalepale. O mea nei e aogā i le soifuaga ma isi tagata.”
“O le aganuu a Samoa o loo malosi ma tumau pea e faatusa atu i uso a Aporiti o Ausetalia nei, Maori i Aotearoa, Tagata Hawaii ma Initia mūmū o Amerika sa osofaia ma taumafai tagata papae e tineia motu.” O le taimi nei ua toatele atu Samoa ua soifua i fafo mai o le atunuu ma o se luitau ia puipui la tatou aganuu ma faatupu ma olaola i atunuu mamao.
Sa fiafia foi le alii faiaoga i Aukilani i le Polokalame amata i Sini nei mo le faatāuaina e talavou o gagana ma le silafia o le faasamoa ua faaigoaina, ‘Talavou Auro 2015’.
“O lenei vaitau ua tele ina faatuatuanai tupulaga Samoa e soifua i fafo i le tatou aganuu ae faamuamua isi faiga ua vaaia. E tatau na uumau pea lo tatou faasinomaga auā o le amataga lea o le mautonu (confidence) aemaise le mitamita i lona ia lava tagata soifua.” Sa ia faafetaia pea le sao o nuu ma afioaga aemaise Lotu Faavae mo le faaolaolaina o le aganuu ma tala‘iga faakerisiano.
O loo tusi nei e le Afioga Toeolesulusulu lana tusi lona lima i le talafaasolopito o Samoa mai le tausaga 2000. O le tausaga 2012 na ia manumalo ai i le faailoga tusitala talafaasolopito a le Malo Taupulega le Scott Prize.
