Ua faamaonia nei le sauni o le Tautua Samoa e toe faaui i tua le latou tagi e ala i se su (lawsuit) faasaga i le Fofoga Fetalai o le Palemene ina ua faailoa lea tulaga i le tauaofiaga a le Fono Aoao Faitulafono a le atunuu i le vaiaso na tea nei na toe tauaofia ai le Fono Sili a Samoa mo ana galuega faaauau.
E $10 miliona se vaegatupe o loo su ai e le pati faaupufai e lei lesitalaina faaletulafono o le Tautua Samoa le fofoga o le fono, e mafua i le faaiuga na soloia uma ai nofoa o sui faipule e toaiva o lea vaega faaupufai, ae na toe faaleaogaina le faaiuga i se faaiuga a le faamasinoga maualuga na lui ai e le Tautua Samoa le faaiuga a le fofoga o le fono.
O le Aso Gafua 17 o Aukuso na toe usuia ai le Palemene, lea na amata lava i le saunoga a le Fofoga Fetalai na ia faailoa ai le faia o lana iuga e le tuuina atu le solia e le faipule o le Tautua o faaiuga a le palemene (contempt of Parliament) i le komiti o tulaga aloaia ma amioga mamalu a sui usufono, ae ia faatoese sui o le Tautua Samoa i le Palemene o le atunuu.
O faatoesega ia na faailoa ai e le faipule o Aiga i le Tai, le afioga Mulipola Oliva o le a feiloai le latou faafaletui ma talanoaina loa le toe ave i tua o le mataupu mai le faamasinoga.
O le finagalo foi lea na agiga i le saunoga a le sui faipule o Faleata i Sisifo o le taitaifono o le Tautua Samoa, le tofa Lealailepule Rimoni Aiafi.
O le agaga autu o sui mamalu o lea vaega faaupufai ia maua e i latou le loto faamagalo ma faagalo futia ua tuanai, ae alo i luma le Sa o le atunuu aua se manuia o Samoa.
Faigata ona talia faatoesega
Sa le faatagaina e le Fofoga Fetalai ona toe afea lava e sui faipule o le Tautua Samoa tulaga na aliali mai i le faaiuga na soloia ai o latou nofoa, pe toe agai se finagalo i le tulaga na ulufale faamalosi ai sui o lea pati i le Palemene i le aso 15 o Iuni 2009.
“Ou te fautuaina sui mamalu e tuuina sao mai faatoesega i le maota”, o se vaega lea o le finagalo o le Fofoga Fetalai le tofa Tolofuaivalelei Falemoe Lei‘ataua.
O le sui sinia ma matua o le Tautua Samoa mai le itumalo o Falealupo, le afioga Aeau Peniamina na muamua tulai, peitai e ui sa taumafai atu sona finagalo e afea tulaga na tutupu ma aliali mai, ae sa faauilavea le fofoga o le fono. “Ou te fautua atu i le sui e faigofie lava lau faaiuga, o le faatoese pe leai”, na saunoa ai Tolofuaivalelei.
“Ou te usitai tele i lau faatonuga lau afioga i le Fofoga Fetalai, ae paga lea o loo faafofoga le atunuu ma lou itumalo, ae ui i lea ou te faamalulu atu i lau afioga ma faamagalo mai se sese o lenei itumalo ma lenei itu o le maota”, na saunoa ai Aeau Peniamina.
Ina ua tulai le sui faipule o Safata le afioga Palusalue Faapo II, sa le mafai lona fia pai lava i le mataupu sa aafia ai le latou itu ma faia ai le faaiuga a le fofoga o le fono, peitai na aliali ai se tau feteenaiga o le finagalo o le sui mamalu ma le Nofoa (Fofoga Fetalai).
Ae na manumalo le finagalo o le Alii ma faamaualalo ai le sui o Safata. O le afioga Palusalue le tasi o sui na pito ilitata ma ia teena le faaiuga na faia ia i latou, aemaise le toe faatulai ese ma o latou nofoa mai le Palemene i le aso 15 o Iuni, lea na aliali ai ni feupuaiga ma le Nofoa i lea taeao.
O le tasi o sui sa faigata ona ia talia le faatoesega na faatonuina, o le afioga i le Aloalii Vaai Solia Papu Vaelupe Vaai, o le sui o le itumalo o Vaisigano numera tasi.
“E muamua lau afioga, ou te fia malamalama pe aisea o le a faia ai lenei faatoesega, ae poo ai tonu na amatamea i le mataupu na tulai mai”, o le finagalo lea o Vaai Solia Papu na lafo i le maota fono. “O loo tuufesili lava lo‘u nei sui pe aisea, ae o le a se mea ua mafua ai”. Na faauilavea foi le fofoga o le fono ma fautuaina le sui o ia o se tasi ua leva foi tausaga o seei i le tofi faipule o le Palemene.
Na manumalo le agaga o le Atua ma toafilemu lea taeao i taualumaga amata a le fono, ma ua toe sologa lelei nei galuega a le Fono Aoao, ina ua faatoese sui o le Tautua Samoa ma fefaamagaloai ma le fofoga o le fono ma le palemene.
Na tulai le alii Palemia, Susuga Tuilaepa Lupesoliai Sailele Malielegaoi, ma faailoa i le maota fono le sese o tuuaiga na faasagasaga atu ia te ia na taua ai o ia lava na taulamua i le fautuaina o se faaiuga a le Fofoga Fetalai na soloia ai nofoa e iva.
E leai se finauga na tulai mai ma ua toamalie foi mea uma.
