Malosi molimau, e aafia soifua o tagata i suiga o itu auala

Ua iloa i le faamasinoga i le va o le au tetee i le suia o le itu o le auala e malaga ai taavale i Samoa le PASS ma le Malo, le malosi o molimau a le itu tagi e faavae ai le latou finauga, e lei lava tapena le Malo i le faatinoina o le suiga aua e le gata e tele vaega e tatau ona tapena i ai, e pei o le suia o faailoilo o le auala, faalauteleina o alatetele, sui moli i luma o taavale foeuli agavale, ae o pioga o le alatele e le saogalemu.
O tupe foi e faitau miliona e faatino ai ia suiga o le isi lea mau malosi a le au tetee.
O le Aso Gafua, 17 o Aukuso na amata valaauina ai molimau o le mataupu lea na tatala lava i se alii Niu Sila o Graham John Williams ua 37 tausaga o galue i le Matagaluega o Leoleo i le vaega e nafa ma le suesueina o mafuaaga o faalavelave tau taavale i luga o aualatetele.
O le molimau a lea alii poto faapitoa na ia lapataia ai le tele o ni faalavelave o le a aafia ai taavale o meatotino a tagata ma le Malo faapea ma soifua pe a oo ina faataunuu le suiga.
Sa faia se suesuega a lea alii ua iai le silafia ma le poto aoaoina i mafuaaga o faalavelave i luga o auala i nisi o magaala i Samoa i le masina o Aperila, lea na ia faia ai se lipoti o loo taua ai, e tatau ona faalautetele i tua auala uma i nuu ma afioaga, ma ia faaleleia pioga o aualatetele ona e faigata ona silafia e le ave taavale e agavale le foeuli le agai ane o le taavale foeuli taumatau.
E mafua lea tulaga ona e eseese itu e tutu ai foeuli. O le tasi itu na faaalia e le molimau, o moli poo headlights o taavale foeuli agavale e tatau ona sui, ona e segaia ai fofoga o ave taavale foeuli taumatau.
O lana faamatalaga e eseese fausaga o taavale ma ua uma ona faatulaga moli o taavale foeuli agavale ia le susulu sao atu i le po i foliga o le isi ave taavale foeuli agavale pe a fepasiai.
Ae afai nei e sui le itu auala e malaga ai o le a susulu sao ane lava moli o le taavale foeuli taumatau i le taavale foeuli agavale, ma a fua i le tele o taavale foeuli agavale o loo i le atunuu, e matua tele se faaletonu o le a tulai mai ma tele ai faalavelave tau taavale e tutupu i luga o auala ma maumau ai soifua o tagata.
O pioga foi i le tele o nisi vaega o auala i nuu i tua i Upolu sa silasila i ai le alii o Graham e le o saogalemu, ona e maualuluga le vao ma laau o loo ola i tafatafa o le auala ma e matua afaina lava le fepasiai ai o taavale, aemaise foi o le a sui le itu auala e feoai ai taavale, ma o le a tele taavale foeuli agavale e ui i le itu sese ona pito uma lea i tua o ave taavale ae pito ane pasese i le moa o le auala.
Na ioe le molimau o galuega ua faia nei e le Malo i le fausia o patupatu poo road humps ma le faaitiitia o le saosaoa o taavale o le a faaitiitia ai faalavelave i le taimi o le suiga, peitai e le mafai ona taofia ai ni faalavelave.
O patupatu ua fausia nei o le a mo se taimi le tumau, ae a masani loa tagata i le itu agavale o le a ui ai taavale ona toe ave ese lea.
E le o lava faailoilo i vaega eseese o le atunuu e faailoa ai le suiga ma le itu e tatau ona uia e taavale, o se itu e ao ona ave i ai le faamuamua e pei ona taua e le molimau, ma le faaaogaina o fusipau mo le saogalemu poo safety seat belts e le o faamalosia ma o se isi lea itu o le a tele ai ni soifua e aafia. Na taua e le molimau lona toe malaga mai i Samoa i le faamasinoga, ae ia vaaia e tolu taavale a leoleo e le o faia ni fusipau o le alii o malu o le Malo, ma o le faamaoniga lea o lana mau.
O amioga a avetaavale o se isi lea popolega o le molimau, ona o lana matau e fulisia ave taavale i le leiloa tausisia tulafono o le saogalemu.