O le Aso Toonai 7 o Mati, na tatala ma faalauiloa aloaia ai le ata tifaga fou ua faaigoaina o le Ta Ta Logo Masefau. O lenei ata tifaga o se galuega na galulue faatasi ai le Ekalesia Katoliko a Tuanai ma le South Seas Pictures.
Ole tala o loo pu’eina ai le ata tifaga, o se talatuu lava a le afioaga o Tuanai, ile teine o Sina lea na aumoe mai iai le Tagaloalagi, peitai, na ia teena le aumoega ae mulimuli ane aumoe mai le Tui Fiti ma talia e Sina e ui na fautuaina e lona tuagane o Masefau ina ia talia le aumoega a le Tagaloalagi.
O le mafuaaga lea na to’atama’i ai tele Tagaloalagi na ia faaoga lona mana ma faa ‘emo ai le uila ao, ma liumaa ai le Tui Fiti ma lona auvaa.
O le mau a Tuana’i, o le mafuaaga lea o le igoa o le afioaga o Leauvaa, ona o le auvaa o le Tui Fiti na liumaa i gatai o Tuana’i. E mai lava ile taimi nei, e tele pine faamau o lenei tala o loo iai i totonu o le afioaga o Tuanai. O le mafuaaga na pu’eina ai lenei ata tifaga, o le sailia lea ose seleni e fausia ai se maota e tua iai le ekalesia, o le taimi nei, o le maota o le galuega e fai tasi uma iai mea fai a le aulotu. “E tagi i lima le faamoemoe lenei, e le auma foi lo matou saele atu i Niu Sila e su’e mai se tupe, ae fai sa matou galuega i Samoa nei ona momoli atu lea i alo ma tama fanau a Tuana’i o loo papa aao i Niu Sila e saili ai tupe e faatino ai le galuega e pei ona faamoemoe iai le ekalesia.” O se finagalo lea o le Susuga ile Faafeagaiga a le ekalesia le Rev Manupo Aukuso (F.K). Na masii mai le fala sii gata i tapaau o le afioaga, e pei ona malaga mai le afioga ia Sa’ena Poao Seiuli Vilo, faapea le afioga ia Tuitele Melota, faapea le tama matua o le ekalesia le tofa ia Valavasa Tupai Lorenese, o le tausi ia Ario Faletalaiga Moevao ma le tina ia Valavasa Akenese aua le faamoemoe o le ekalesia. O le tofa ia Toa Tavita sa ta’ita’ia le mafutaga a Tuanai i Niu Sila nei, na faamopopoina le posiva e tatala aloaia ai le ata tifaga ma saili ai se seleni mo le galuega, e pei ona faataunuina ile East Tamaki Community Hall i Otara.
O le susuga ile tiakono ia Falanisisi mai Samoa, o le faafeagaiga mai le afioga o Leauvaa, na ia ta’ita’ia le sauniaga amata, ae o le afioga ia Sa’ena Poao Seiuli Vilo na saunoa e fai ma sui o le aumalaga mai Samoa e faailo le mafuaaga o le faamoemoe ole ekalesia ua mafua ai ona faatagisia se fesoasoani mai Niu Sila nei. Na ia saunoa faafetai ai foi ma momoli le faamalo i alo ma fanau a Tuanai i Niu Sila nei, ona o le lagolagoina o le faamoemoe. O le tauaaoina atu o le ata tifaga fou ile ekalesia na saunoa iai le Pule Faatonu o le South Seas Pictures, Tanupo Fiu Fogalevai Lemalu Aukso.
O le tofa ia Toa Tavita na faafeiloa’ia le auvalaaulia ma o ia foi sa tu ile foe ile faasoloina o polokalame o le aso, o se tasi o itu na faatauaina ile maitau ona e le na o tagata lotu katoliko na auai ile faamaopoopoina o lenei faamoemoe, ae o le toatele o le mafutaga i Niu Sila nei e ese ekalesia e tapuai ai, ae ua tutu lava ile agaga e tasi ma pupulima ona o le manatu ile faasinomaga ma le tupuaga e pei o upu a le atunuu “E lele le toloa ae maau lava ile vaivai.”
E ese foi lagona pe a oo ina lolo’u mai le alofa ile faasinomaga ma le lotonuu, e siva ma le fiafia, e foai foi ma le loto malie. O uiga ia na maitauina a’o faagasolo le posiva a le afioaga o Tuanai. O le tofa ia Valavasa Tupai Lorenese na fetalai e fai ma sui o le aumalaga mai Samoa e faafetai Samoa na potopoto, tainane o paolo ma gafa ma le mamalu ile afioaga o Tuanai, ile afio Sa’ena ma le aiga sa-Sa’ena, afioga alo Fuatinoa ma Tuitea na tofiga papa, afifio foi le Faavaoga ma Ututaaloga, tainane le fetalaiga ia Tupai, Lefale ma le Afu Alataua.
E luasefulu lima afe le tupe na tauaaoina ilea aso, na faaleo ai ele afioga ia Sa’ena Poao lona agaga fiafia ma le faafetai ona o le amana’ia o le faatalauula mai o le ekalesia mai Samoa, ua maua ai lenei seleni tele aua le fausia ina o le maota o le galuega.
O le vaiaso nei o le a toe taliu ai le faigamalaga i Samoa. O le vaiaso nei lea ua amata faatauina atu ai le ata tifaga fou mo le maimoaga a le atunuu, mai le Samoan Movies i Otahuhu faapea faleoloa masani.
