Ose tasi o faamoemoe ole laulaufono ale Fono Faufautua mo tagata Samoa i Vitoria na silasila mamao iai talu ona tulai mai ile tofi ile amataga ole tausaga nei, ole faatino lea o fesoasoani mo aiga Samoa i soo se vaega ole soifuaga, tuu pea le faiva ole faaleagaga ile Aufaigaluega ale Atua ma ekalesia, ae o fesoasoani mo le tele o manaoga ole a taumafai lava ise mafai e oo iai.
E lē fou le mataupu lenei mo aiga sauaina, peitai o se talosaga ale matagaluega o malu ale malo a Vitoria, ole fia maua lea o se malamalamaaga ile faatupulaia pea o lenei faafitauli i aiga Samoa, lea ua galulue faatasi ai nei ma le Fono mamalu a Samoa, e faatalanoaina ni auala e ono maua ai ni fofo mo le faafitauli ogaoga, ole Aso Toonai na tuanai atu na afifio ane ai se fomai (doctor) ale matagaluega mo mataupu faapenei ma sona soatau tamaitai, ma amata soalaupule ma iloilo le mataupu, na saunoa Dr Hussein.
E lē o ile matagaluega se fofo, e itiiti lava foi se silafia oloo i leoleo i tu ma agaifanua faa-Samoa, o a latou faamaumauga foi e matuā fuamoa aato lava se tali mautu o mafai ona maua e ui ua loa nai tausaga o taumafai, na o latou fesiligia la tatou aganuu ma aga feavaavata’i, faatasi ma le soifua talitonu ma le faatuatua faakerisiano, ae pe faapefea foi ona taotolua ma galulue faatasi le tulafono ma la tatou aganuu, aua o la latou maitau, ua afaina ai alo ma fanau aemaise o o latou lumanai, ma atonu o se tasi nei o mafuaaga ua faatupulaia le fuainumera o tamaiti faatupu vevesi i nofoaga faitele.
Na fa’ifa’i mamalu le tofa faatupu ma le silasila faatamalii ale Fono, ole finagalo ia togi pa tau ile ave, aua ne’i na ona avatu ma aumai faamatalaaga, ae ua naunau e fai se ai, ua masuiga mālie nisi o fesili ma o latou tali, ae ua talia nei le Aso Toonai o muamua lea ole a fefulisa’i ai e le matagaluega ma le itupa o tina ma tamaitai ale Fono mataupu nei ma fesili, ona amata faalauaitele loa lea i ekalesia ma le atunuu atoa se taulogologo ale Fono ma le matagaluega o leoleo.
