O le tamaitai loia sinia i le ofisa o le Loia sili a le Malo o se tasi o sui o Loia sili o loo faauluulu i ai le vaega o mataupu tau soligatulafono le Criminal Division, le tamaitai o Precious Chang, na ia faailoa mai i le tusitala le tuuina atu o se tusi saisai e sailia ai le afioga Muagututagata Peter Ah Him, le minisita lagolago o Fefaatauaiga Pisinisi ma Alamanuia ina ua lē oo atu i le valaauga o ona moliaga i le Faamasinoga Maualuga.
O le faamatalaga a le tamaitai loia na faia le poloaiga mo se tusi saisai ina ua lē oo atu lē ua molia, ma o se faiga ua masani ai le faamasinoga pe afai ua lē oo ona tauaofia ai le faamasinoga ona o se tuatuagia tāua o le faamasino.
Na mafua ona saili se faamatalaga mai le loia sinia a le Malo ona sa lē taunuu ona valaau faamasinoga i le Aso Gafua na tea nei ona sa auai le Faamasino sili i se mafutaga faaleaoaoga.
O le lipoti a se tasi o nusipepa na faailoa ai e le Ofisa sili o Faamasinoga o se tasi foi o Lesitala sinia o le faamasinoga le tofa Masinalupe Tusipa Masinalupe, e leai se tusi saisai na poloaina e le faamasinoga ona e lei oo ona valaau mataupu ae ua na o se lesitala na valaauina mataupu taitasi ma toe faatulaga.
O le faamatalaga foi a le Ofisa sili e leai se faamaumauga o i luga o le faila o le mataupu a le afioga Muagututagata o faaalia ai se tusi saisai ua faatonuina e le faamasinoga. Sa toe saili atu e le tusitala se faamatalaga mai le tamaitai loia o Precious Chang poo le ā tonu le sa‘o ona o lea ua teena mai e le Ofisa sili o faamasinoga le faia o se tusi saisai.
E faalua ona telefoni i ai i le ofisa o le Loia sili ae o le tala mai le tamaitai tali telefoni e malie o loo pisi i se fonotaga le tamaitai loia ae toe valaau atu i se taimi. E mānava galuega o le Aso Faraile na tea nei o taumafai atu pea, ae lē maua lava se avanoa o le tamaitai loia. E leai foi se faamatalaga aloaia ua aumaia e leoleo ma le ofisa o le Loia sili poo fea tonu le sa‘o o le tusi saisai pe afai na iai se poloaiga a le faamasinoga.
E fā moliaga o Muagututagata e mafua i se tagi a le kamupani mai Saina o le Grand Oceania Company Limited. O moliaga e aofia ai le faasese o faamaumauga tau tupe, le moliaga o le gaoi ma le moliaga o le faia o ni gaioiga solitulafono poo le fraud.
O le tamaitai loia sinia o Precious Chang na ia faailoa mai moliaga o le alii minisita lagolago. O le amataga o le vaiaso nei na toe valaau ai le mataupu faatasi ai ma isi mataupu sa tolopo mai i le vaiaso nei ona o le lē avanoa o le faamasino sili i le Aso Gafua ua mavae.
