Tatala le maa faamanatu o le tina ia Alofa Kilesa Tau Kamuta

O galuega lelei a mātua e lē mafai ona aveesea lea ma loto o le fanau, auā o le fatu lea e ola ma tupu pea i totonu o aiga i aso ma tausaga uma. O soo se mea foi la e aumau ai fanau ma aiga, e maau lava i le mea na fofoa mai ai le olaga ma le faasinomaga.
E ui i le loulouā o le tau i le Aso Toonai, ae lei tuua ai lava le naunau o fanau i le faia o se mea lelei e faamanatu ai pea galuega alofa ma le titifaitama o mātua. O le tatalaina o le maa faamanatu o le tina ia Alofa Kilesa na tumutumu ai le nofoaga o le fanuatanu i Manukau i lana fanau na malaga mai i Ausetalia, Amerika, Samoa ma Niu Sila nei.
O le taitai o le sauniga o le susuga i le faafeagaiga ia Pule Palate mai le Ekalesia o Kalevaria Papatiso i Otara. O le ulumatua o le fanau o loo aumau i Samoa le susuga ia Tau Naime na ootiina le lipine o le maa. Ae o le tolaulauina o Saafiafiaga o le tina, na fofogaina lea e se tasi o ona alo le faletua ia Peleiupu Nanai. Na mae‘a le sauniga ona faaiu lea i le faleaiga o le Happy Days i le taumafataga, ma fai ai ma faaaloaloga. O le susuga lava ia Tau Naime sa fai ma fofoga o aiga e momolia le faafetai ma meaalofa i le susuga i le faafeagaiga ma le paia o le auvalaaulia. O le tina ia Alofa Kilesa Tau Kamuta e toaiva ona alo, e mai le afioga o Manono-tai.