E leai se isi faaupuga ae nao le faafetai, e agatonu ai le faaaloalo maualuga, ma le fesoasoani e ala i le aao mafola sa tauaao iai le mamalu o le atunuu, ma i latou sa auai i le taumafataga saili tupe mo le tamaitai o Elizabeth Alenepi-Siolo.
E lei manatu foi le tina mafatia o Peta Alenepi Siolo, faatasi ai ma lona aiga, o le a taulimaina se seleni tele e pei ona taua, aua se fesoasoani i le pili o le falemai, ma togafitiga o si ana tama sa feagai ma le mai tigaina.
O le seleni e $13,000 sa maua i pepa ulufale sa faatauina mo le taumafataga, atoa ai ma nisi lava o fesoasoani sa auala eseese ane i le po sa faataunuuina ai lea faamoemoe.
Pe tusa ma le lua vaiaso talu ai na faataunuuina ai le taumafataga tele, sa tuufaatasia ma faauluulu i le alii faipisinisi o Lui Machine Tupai, faapea sui o le aiga le faletua ia Mile Seupule, ma le tina ia Perth Alenepi.
O le Aso Faraile o le vaiaso talu ai, na feiloai ai le sui o le Samoa Times, ma le susuga ia Lui Tupai, faapea le aiga e molimauina ma faamaonia le atoaga o le seleni sa tauaaoina, ma ua faamaonia mai le faletupe.
O le tuai na fofogaina le atunuu i le aofaiga o le lenei sa mauaina, ona talu ai o le tele o siaki tupe sa talia le faamaonia ma taliaina aloaia e le faletupe. O le seleni e pei ona ta‘ua, o le tupe lava lea sa mauaina i le po o le taumafataga.
Ae o se saunoaga a le susuga ia Lui Tupai sa faatuina le lafo mo le taumafataga saili tupe, sa ia ta‘ua ai le fiafia tele ina ua mae‘a faataunuuina lea faamoemoe, ma sa vaaia ai le lagolagoina e le toatele o tagata eseese.
E lē na o Samoa, ae sa tumutumu foi mai isi tagata o le Pasefika, sa fia fesoasoani i le agaga ma le autū sa agai i ai lea taumafataga. Saunoa foi Lui ma ia faafetaia tele i latou uma sa auai ane ma talisapaia le faamoemoe mo le afafine ma‘i.
E toatele foi nisi sa taofia le tele o nofoa, peitai e lei mafai ona auai ane i lea po, ona o nisi o mafuaaga tatau. E lei mafai foi ona faaoo ane seleni ma le tau o pepa ulufale sa latou taofia mo le faatauina.
Ae ui i lea, sa ta‘ua e Lui, e lē afaina lea i lona finagalo, auā e lē o se mea na faia ma le faamalosi, a o se fuafuaga sa faia lava ma le loto mamā, ma le loto fuatiaifo lelei, atoa ai ma le fia fesoasoani mo ē puapuagatia ma mafatia.
Sa faaluaina e le sui o le aiga le faletua ia Mile Seupule, lea lava finagalo sa saunoa i ai Lui Tupai. Sa faaopoopo Mile le agaga faafetai ma faamalo, i le mamalu o Samoa ma tagata mai isi atunuu sa auai ma foaia le seleni tele.
O ai ea le afafine o le aiga ua manatu ma faaeleelea ai tamalii ma failauga aemaise auauna a le Atua e ala i le foai tupe ma le agalelei.
O saunoaga lava ia sa faafoi ai e le faletua ia Mile, le faafetai ma faaleo ai le agaga fiafia o aiga, faatasi ai ma le talia faatuaeleele o le seleni.
Sa faafetaia foi e Lui ma Mile le tele o kamupani ma pulega sa lagolago ane, ma tuu ane o latou tau‘au e fesoasoani ai i le faamoemoe.
O Kamupani e pei o le Polynesian Blue, Pacific Easy, Mecury Energy (GLOBUG), CMe, Martin Hautus, Mangere Community Law Centre, Pacific Business Trust, Te Ariki Vaine (Polynesian Dance Team).
O le Tavaesina Trust, Foxie Style Ltd Hair Salon, Crossroad Bar, Lusia Reedy (Relax Fiji), Sapolu Law Office, Robyn Ng Chok, John Kotoisuva, Manhattan Function Centre, Baby Charlotte, Buck Stowers (Big Boys), Amo and Polynesian Entertainers.
O le Lolopo Installations Ltd, Orator Hotel, G-Mana Cars, La o Samoa, UOA Samoa Students Association (UASSA), faapea le Ekalesia Kerisiano Faafouina Samoa Mangere, faapea le toatele o tagata taitoatasi.
O le susuga ia Lui Tupai ma lana kamupani a le Taro Pages i Onehunga, sa nafa ma le tele o isi gaioiga faapea ma le tuufaatasia o le Website poo le upega o fesootaiga mo le tamaitai o Elizabeth i luga o le initaneti, ua mafai ai ona maimoaina ma tuuina i ai foai a le toatele mai soo se tafa o le lalolagi o loo faitauina.
Faaaogāina o le seleni
Na pau le seleni ua faaaogāina mai le aofaiga e pei ona ta‘ua i luga, o le tau o ofu e laei ai le tamaitai o Elizabeth. Sa ta‘ua e Mile e faapea o le tau o le ofu e tasi e $600, ma o ia ofu e faapitoa lava, ma e saunia ma okaina foi e le falemai, ae totogi lava e le aiga latou.
O le mafuaaga e taugata ai e pei ona ta‘ua, ona ua mae‘a ona faia ma tuufaatasia faapitoa lava e faatatau i manaoga o le ma‘i, ma le tulaga ua iai le tino o le tamaitai ma‘i.
O nisi foi o vailaau mo togafitiga, o le tasi lea o vaega taugata tele, ma o loo faaagaga pea lava seleni uma ua i totonu o le teugatupe a Elizabeth, mo talavai ma nisi togafitiga o loo faagasolo pea, aemaise ai o le vaega tupe tele mo taotoga sa faia i le falemai o loo faatalitali pea.
O se isi tala fiafia na maua e le Samoa Times mulimuli ane, ma sa faamaonia foi e le tina ia Perth, o le toe foi lea e faigaluega ina ua mae‘a ona maua le pemita faigaluega.
O se tulaga lelei lea, auā o le a mafai ona fesoasoani tele mo le totogiina ma le faaitiitia o le $106,000 o loo faamalumalu pea.
O loo talia i le taimi nei se feiloaiga a le Samoa Times, ma le ofisa o le Law Centre i Magele o loo nafa ma le talosagaina ma le toe finauina o faaiuga muamua sa fofogaina e le Matagaluega o Femalagaiga a Niu Sila, lea sa teena ai le talosaga mo se nofomau o le tina o le tamaitai o Elizabeth.
Ua mafua lea tulaga, ona e talitonu e tatau ona soloia le pili a le falemai, pe afai ae manuia le talosaga a le tina ia Perth. Ona talu ai e lei faavaivai le tina i le apiliina o faaiuga muamua. E tupu foi le faalavelave i lana tama, a o tatali pea se tali o le isi foi apili sa faia.
O loo fesiligia foi nisi o auaunaga sa tuuina muamua i totonu le talosaga a lea tina, pe o fea tonu o le tulafono o Femalagaiga sa tatau ona ui ai le talosaga muamua.
E lē gata i lea, ae faapefea foi ona faia talosaga apili sa faia. I le ma lenei, Pe aisea na lē tuusa‘o ai le talosaga i le Minisita o Femalagaiga, faapei ona faia e le Ofisa o le Law Centre i Magele, lea na vave tali sa‘o mai ina ua faatinoina.
