“O le aso lenei na faia e le alii tatou te olioli ma fiafia i ai, auā o le faamoemoe ua taunuu o le laau o le Soifua lea.” O matou Agaga e faamanu atu ia te oe o mea uma foi o i totonu ia te i matou. E ao ona faamanuina lona lava Suafa Paia ma ia tumau ia te Ia lona lava viiga.
Faatāuaina e tina Ekalesia Metotisi Samoa a Papatoetoe o loo tausia e le Tausi Matagaluega ia Komiti Alainuuese ma le Faletua ia Tuleiesea Komiti. Matagofie ma lava saunia tina uma mo le latou Aso Sa, auā toe pau lenei o le Aso Sa o Tina, a le Faletua i le Faafeagaiga, ona ua atoa ai le la 7 tausaga o galulue punouai ai i Papatoetoe.
E pei o le fesuiaiga o le laau o le faatoaga tausaga taitasi a le Ekalesia. Na amataina i le tutu faaaloalo uma o Tina a o tatalo le faafeagaiga tutulalai le mamalu o le matagaluega atoa, ae sau le solo a Tina i totonu i ona faagasolo lava lea o le polokalame o le Aso faapitoa mo Tina.
Saunia e le faletua ia Tuleiesea le tatalo, faafetai, faatoesega faletua malolo manumalo ia Pule Amiomio, Manaoga le faletua ia Muava Tupu, Faitau Tusi Paia Fouvale Viliamu, faletua ia Fetuafemata.
Sa laugaina lava le matua o le Aso o Tina o loo i le Tusi Faitau Aso le Ekalesia – o le loto vivii a‘e o le Tina i lona Atua poo le faaeaina le Tina loto vivii. Na mae‘a lea, ona alo loa lea o tina uma lava ia latou Tala ma Faaevagelia ma Pesega sa saunia ma tapenaina le faletua ia Sia Su‘a, ma faia ai le latou Pese Faamavae ma si o latou Tina Faaleagaga, ona toe pau lenei o le latou Aso Sa o Tina ma le faletua ia Tulieesea.
Ae sa amata lava le polokalame faaevagelia, i le faaevagelia a faletua, malolo manumalo Pule Amiomio ma Moeva Tupu. O se Aso Sa o Tina vaaia le loifofoga maligi, ona o se mafutaga o le a motusia ma le Tina o le galuega ua toe o se aga ona taunuu lea.
Sa faaiu lava i le Susuga i le Tausi Matagaluega ia Komiti Alainuuese, ma fai ai loa ma le latou faaulaga ma le toonai tele ma le Matagaluega. “Tina e faia lava e outou mea sili – ma tou manumalo lava”. Manuia tele Tina uma lava Samoa lenei Aso faapitoa mo outou.
