E ese foi lagona na faalogoina e mātua ma aiga aemaise o uo ma ē masani sa auai i le malumalu o le Ekalesia PIC i Avondale i le aoauli o le Aso Sa ua mavae 25 o Oketopa a o fai pesega a le fanau aoga e talitali ai le amataina o le sauniga.
Auā o le aso lea ua avea ai i latou ma molimau ola ma fetu pupula i le faatinoina o le sauniga atoa. O le masani a lenei Ekalesia o le aso malolo a le Labour Day ua fuafua agai i ai le faataunuuina o le Lotu Tamaiti auā e malolo ai nai fanau pe a mae‘a le latou Aso Sa faapitoa.
O le susuga i le faafeagaiga ia Rev Asora Amosa na tatalaina le sauniga i le Aso Sa ina ua toai taunuu le solo a le fanau i totonu o le malumalu, ma amata ai pesepesega a le fanau. O le tatalo o le faafetai na saunia e Feagai Ioane, Faatoesega na tatalo ai Penitito Aumua ma manaoga na saunia e May Poutasi.
Na sosoo ma le papatisoga a le fanau e le susuga i le faafeagaiga ia Rev Asora Amosa ma faagasolo ai loa aitema a fanau laiti. E maeu le matagofie o tauloto a fanauiti aemaise o tapenaga a faiaoga Aso Sa, sa nafa ma le aoaoina o polokalame a tamaiti. O le sini na tatai i ai tauloto a le vasega laiti “o le faamagalo o le ola saoloto.”
O le vasega feololo na amata le latou polokalame i le pese Samoa Maopopo Mai, auā o fea lava e lele i ai le tagata agasala e maau lava i le satauro o Iesu. O le latou tala faatino na momoli mai ai se feau tāua e ala i lima palapalā, e pei o le inupia, ulaula, fia ulavale, gaoi, kopi i le aoga, lima e tusitusi ai tala e faaleaga ai isi tagata ma lima tete e sasa ai fanau, ae lautua i aao o Keriso na tutu‘i i le satauro ia mamā ai nei lima, aemaise o le aumai ai o le saolotoga ma le faamalologa mo tagata lautele.
O le Matua Tauave a le Fanau, “Loto Faamagalo” ma ua filifilia lenei autu e tatai uma i ai lagona ma manatu o faiaoga Aso Sa ma le fanau i le tāua o le faaolataga, e pei ona molimau mai ai le Tusi Paia i le Ioane 3:16 i le alofa o le Atua i le lalolagi.
O nisi o aitema na faaleoina ai e fanau le Tu ma le Aganuu a le atunuu e ala i le ifoga poo le pulou o le tagata i le ietoga e faailoa ai o se auala poo le fale faamasino lea e magalo ai aiga, ae na faaautu lea galuega tala‘i i luga o le satauro o Iesu e magalo ai le pagota.
O le aitema mulimuli na taualuga i ai le polokalame o le Aso Sa e faapea, Faafiti ia au agasala, amo lou satauro ma e mulimuli mai ia te au.
O nei pesepesega, tauloto, siva ma tala faatino na faaautu uma i le faaolataga a Iesu, ua saoloto ai le pagota.
Ma sa molimauina le faauuga a le Agaga Paia i totonu o le malumalu e ala i le faaaogāina o le fanau i le latou polokalame. E maua le ‘ata e maua foi le tagi auā e leai se tasi i totonu o le malumalu e lei lagona le faauuga a le Atua i feau molimoli a le fanau.
Na taualuga le Aso Sa i le oso o le mea malosi i le toonai faatasi o mātua ma fanau i le hall a le Ekalesia PIC e patipatia ai le matagofie o sauniuniga a le fanau ma faiaoga, ae faamalolo ai loa i le Aso Gafua i le aso malolo o le Labour Day.
